د کرکټ ۲۰۲۴ کال نړیوال شل اوریز جام د اتو غوره لوبډلو یا سوپر –۸ مرحلې کې جنوبي افریقا خپله دویمه لوبه هم وګټله او نیمه پای لوبې یا سیمې فاینل ته د تګ لپاره یې خپل مزل لا آسان کړ.
د انګلنډ لوبډلې تر پچې ګټلو وروسته لومړی د توپ اچونې پریکړه وکړله.
جنوبي افریقا په شلو اورونو کې ۱۶۳ منډې وکړلې او شپږ لوبغاړي یې وسوځیدل؛ تر ټولو ډیرې منډې د جنوبي افریقا د سر لوبغاړي، کوینټین ډیکاک وکړلې. هغه په ۳۸ توپونو ۶۵ منډې وکړلې او لوبې غوره لوبغاړی هم وټاکل شو.
جنوبي افریقا د سوپر -۸ په مرحلې کې خپله لومړۍ لوبه د متحده ایالاتو څخه ګټلې وه او ددې پړاو وروستۍ لوبه یې یکشنبه، جون ۲۳ مه د ویسټ انډیز سره ده.
د جمعې ورځې په دویمې لوبې کې بیا ویسټ انډیز وکړی شو په خورا آسانۍ، متحده ایالاتو ته ماتې ورکړي.
امریکا پدې لوبې کې په شلو اورونو کې ویسټ انډیز ته د ګټلو لپاره د ۱۲۹ منډو هدف ورکړی و چې د لوبې په ۱۰.۵ اورونو کې پداسې حال کې پوره شو چې د ویسټ انډیز یوازې یو لوبغاړی سوځیدلی و.
د ویسټ انډیز لوبغاړي شې هوپ په ۳۹ توپونو ۸۲ منډې وکړلې او د لوبې تر پایه ونه سوځید. په توپ اچونې کې بیا د ویسټ انډیز لوبغاړي راسټن چیس د امریکا درې لوبغاړي وسوځول او د لوبې غوره لوبغاړ شو.
ټاکل شوې چې افغانستان په سوپر-۸ مرحلې کې خپله دویمه لوبه سبا شنبه جون ۲۲ مه د اسټرالیا سره وکړي. د شنبې ورځې دویمه لوبه د هند او بنګله دیش تر منځ ده.
افغانستان او بنګله دیش پدې مرحلې کې خپلې لومړنۍ لوبې بایللي دي. افغانستان په هند او بنګله دیش په اسټرالیا بایللې ده.
فورم \ دبحث خونه