د افغانستان د ملي اردو د کومانډو ځواکونو چارواکي وايي، چې په فاریاب ولایت کې د افغان ځواکونو او وسلهوالو طالبانو ترمنځ نښته کې د کومانډو ځواکونو شپږ سرتیري وژل شوي او یو ټپي شوی دی.
د کومانډو ځواکونو ویاند جاوید سلیم امریکا غږ آشنا ته وویل، دغه شمیر سرتیرو ته تیره شپه د فاریاب ولایت په خواجه سبزپوش ولسوالۍ کې د ځانګړو عملیاتو پر مهال د وسلهوالو طالبانو د کمین په نتیجه کې مرګژوبله اوښتې ده.
هغه زیاته کړه "تیره شپه موږ په فاریاب ولایت کې څو عملیات درلودل، په غورماچ، درزآب، د فاریاب کوهستان او د سرحوض په کلي کې مو هممهاله عملیات درلودل، په خواشینۍ سره چې د (فاریاب – جوزجان) په لومړۍ نمبر لویه لاره کې یوه پېښه رامنځ ته شوه، له دښمن سره د نښتې په نتیجه کې زموږ شپږ نفره شهیدان شول او یو کس زخمي شو".
ښاغلي سلیم وویل، چې په نښته کې یو شمیر وسلهوال طالبان هم ټپیان شوي دي.
د هغه پر وینا، پېښه د خواجه سبزپوش ولسوالۍ په ګورزاد کوتل سیمه کې رامنځ ته شوې ده.
په ورته وخت کې د فاریاب ولایتي شورا د دغه ولایت په یو شمیر سیمو کې د وسلهوالو طالبانو د ګواښونو د زیاتوالي په اړه اندیښنه ښيي.
د فاریاب د ولایتي شورا غړي طاهر رحماني امریکا غږ آشنا ته وویل "که لږ غفلت وکړو د میمنې ښار سوزول کیږي. له سیمهییزو مسولینو سره شیبه په شیبه په اړیکه کې یو،موږ ته ډاډ راکوي چې ستونزه نشته، امنیت ټینګ دی او طالبان حرکت نه شي کولی".
د ولایتي شورا رئیس زیاته کړه، چې د نظامالدین قیصاري وسلهوالو د هغه د خوشې کولو لپاره د اعتراض په توګه شاوخوا دولس پوستې طالبانو ته پریښې دي.
وسلهوالو طالبانو تر اوسه په دې اړه رسنیو ته څه نه دي ویلي.