د سري لانکا کرکټ بورډ د جمعې په ورځ مۍ ۱۰ (غوايي ۲۱) وویل، د خپلو نړیوالو لوبغاړو د ټیسټ لوبو معاشونه یې دوه چنده زیات کړي او د سپین توپ د لوبو دپاره د لوبغاړو په معاش کې ۲۵ سلنه زیاتوالی راغلی دی.
کرکټ بورډ همدارنګه د سري لانکا د هغو لوبغاړو د پاره ځانګړي انعامونه اعلان کړي چې وکولای شي د کرکټ نړیوالې شورا (ای سي سي) د غوره لوبغاړو د طبقه بندۍ په لومړنیو لسو مقامانو کې ځای ونیسي.
کرکټ بورډ ویلي چې له ۴۱ لوبغاړو سره یې یو کلن قراردادونه لاسلیک کړي دي خو ددغو لوبغاړو د معاشونو د اندازې په اړه معلومات ندی خپور شوی.
د سري لانکا پر کرکټ بورډ باندې د اداري فساد تورونه لګول شوي خو د کرکټ بورډ مقاماتو دغه تورونه رد کړي دي.
په کرکټ بورډ باندې د اداري فساد د تورونو له امله، تېر کال د بورډ د مسئولینو او د سري لانکا د سپورت وزیر روشن راناسینګ ترمنځ جنجال دوام درلود.
راناسینګ په نومبر کې د کرکټ په نړیوال جام کې د هند په وړاندې د سري لانکا له ماتې څو ورځې وروسته د کرکټ بورډ ټول کارکوونکي له دندې ګوښه کړل.
د کرکټ نړیوالې شورا په غبرګون کې، د سري لانکا د کرکټ بورډ په چارو کې د حکومت د مداخلې له کبله په ای سي سي کې د سري لانکا شمولیت وځنډاوه.
د ای سي سي قوانین د کرکټ بورډ په چارو کې د حکومت د لاس وهنې مخنیوی کوي او له دې وړاندې یې هم د سري لانکا غړیتوب ځنډولی و.
د مالي او سیاسي کړکیچ سره د لاس او ګریوان سري لانکا حکومت له وړاندې دیوالي شوی او کرکټ بورډ په دغه جزیره يي هېواد کې تر ټولو شتمنه اداره ګڼل کیږي.
فورم \ دبحث خونه