د کندهار د پولیسو د وینا له مخې نن د دوشنبې په ورځ غرمه شاوخوا یوولس بجې یو ځانمرګي بریدګر د چاودیدونکو توکو ډک موټر ته د دامان په ولسوالۍ کې د بهرنیو ځواکونو د موټرو د کاروان مخې ته چاودنه ورکړې، چې له امله یې د برید ځای سره نږدې په یو جومات کې یوولس ماشومان وژل شوي.
د کندهار د پوليسو د مطبوعاتي دفتر مرستیال مطیع الله هلال امریکا غږ اشنا رادیو ته وويل، چې ځانمرګي بریدګر د دامان ولسوالۍ کې د رومانیايي عسکرو د موټرو کاروان سره نږدې د چاودیدونکو توکو ډک موټر ته چاودنه ورکړې، چې له امله یې ۱۶ تنه نور ټپیان شوي هم دي.
ښاغلي هلال وویل " د ولسوالۍ د عبدالله په کلي کې، چې د هوايي ډګر سره نږدې موقعیت لري یو تن ځانمرګي برید ګر د موټر په وسیله د رومانيايي عسکرو د ګزمې پر موټر چاودنه کړې، چې په یوه مسجد کې په درس بوخت ۱۱ تنه ماشومان پکې وژل شوی، ۵ رومانیايي عسکر، ۲ پوليس او ۹ تنه هم ملکي وګړي چې میرمنې هم پکې شاملې دي ټپیان شوي".
ښاغلي هلال وویل،چې دا ملکي وګړي له سیمي څخه د تیریدو په حال کې وو، چې برید وشو او هغوی په کې ټپیان شول.
د پېښې ټپیان د کندهار د نړیوال هوايي ډګر روغتون ته د درملنې لپاره لېږدول شوي.
د پېښې وروسته سیمه د نړیوالو عسکرو له لوري کلا بنده شوې.
رومانیايي عسکر د کندهار د نړیوال هوايي ډګر د امنیت د ساتلو مسئولیت لري.
په کندهار کې د نړیوالو قواوو د قومندانۍ مطبوعاتي دفتر تر اوسه پدې اړه کومه تبصره نده کړې.
تر اوسه چا د دې برید مسئولیت په غاړه ندی اخیستی.