په کابل کې پولیس وايي یو ځانمرګي درې کسان ووژل چې یو یې پولیس دی. په برید کې ۱۲ ژوبل شوي هم دي چې درې یې پولیس دي.
د کابل د پولیسو ویاند بصیر احمد مجاهد امریکا غږ آشنا ته وویل، چې په ټپیانو کې هم درې کسه پولیس شامل دي.
هغه وویل "د کرکټ بورډ د امنیت لپاره درې امنیتي کمربندونه جوړ شوي، چې بریدګر په لومړي کمربند کې د پولیسو له خوا وپیژندل شو او ورسره چاودیدونکو موادو ته یې چاودنه ورکړه".
د افغانستان د عامې روغتیا یو چارواکي محمد سلیم وايي په ۱۲ زخمیانو کې دوه ماشومان هم شامل دي.
د چاودنې ځای ته نږدې د کرکټ او فوټبال لوبغالي موقعیت لري، چې په کې د کرکټ شپږیزه لیګ او د فوټبال غوره لیګ سیالۍ ترسره کیږي.
د کابل د پولیسو د ویاند پر وینا، چې بریدګر غوښتل د کرکټ لوبغالي ته دننه شي، خو هدف ته له رسیدو مخکې یې ورسره چاودیدونکو موادو ته چاودنه ورکړه.
دغه ځانمرګی برید په داسې حال کې ترسره شوی، چې د کابل په کرکټ لوبغالي کې د شپږیزې کرکټ لیګ سیالۍ دوام درلود.
په دې سیالیو کې د ګډون لپاره یو شمیر بهرني لوبغاړي هم کابل ته راغلي دي.
د افغانستان د کرکټ بورډ ویاند فرید احمد هوتک امریکا غږ ته وویل، چې د کرکټ په لوبغالي کې حالت نورمال دی او د لوبغاړو تر منځ سیالۍ دوام لري.
د داعش خبري څانگې اعماق، رپوټ ورکړی چې دغه حمله ددې ډلې یو غړي کړې ده.