د تاجکستان جمهور رئیس امام علي رحمان وایي په افغانستان کې د سیاسي، بشري او دولتي ادارې اړوند بحران د سیمې د ثبات او امنیت لپاره جدي ګواښ دی.
ښاغلي رحمان دا څرګندونې د ملګرو ملتونو عمومي کلنۍ اسامبلۍ ته په وینا کې وکړې چې د مخکې نه ثبت شوې وه.
د تاجکستان جمهور رئیس وویل چې هیواد یې د افغانستان سره تقریباً ۱۴۰۰ کیلو متره ګډه پوله لري او په هغه هیواد (افغانستان) کې د بحران په اړه "زمونږ حکومت او ولس بې تفاوته نشي پاتې کیدی. "
نوموړي په خپلو خبرو کې دا هم وویل چې په افغانستان کې د طالبانو واک ته رسیدل چې د هغه په قول د ملګرو ملتونو د امنیت شورا سره د یوې ترهګرې ډلې په توګه ثبت دي، د سیمې وضعیت یې لا پیچلی کړی.
ټولشموله حکومت
امام علي رحمان وویل چې طالبانو د یو ټولشموله حکومت د جوړیدو په هکله پخپلو ژمنو وفا نده کړې. هغه وویل دا چې په حکومت کې د افغانستان سیاسي او قومي ځواک پراخ ګډون نلري، "د جدي اندیښنې وړ ده".
د تاجکستان جمهور رئیس پخپلو خبرو کې وویل چې د ګاونډي هیواد په کورنیو موضوعاتو کې لاس نه وهي خو زیاته یې کړه چې د افغانستان د سیاسي او امنیتي ستونزې د حل لپاره په کار ده چې ټولشموله حکومت د انتخاباتو او د هغه هیواد خلکو د ارادې سره سم جوړ شي.
ښاغلي رحمان وویل چې په ټولشموله حکومت کې باید ټولې سیاسي ډلې او قومي اقلیتونه برخه ولري.
هغه وویل، " هر ډول حکومت چې د افغانستان د ټول ولس ګټې پکې نه وې نغښتې، ناوړه عواقب لري."
ښاغلي رحمان د بشري حقونو په سازمانونو هم جدي انتقاد وکړ او زیاته یې کړه چې د بشري حقونو د سرغړاونو په ځانګړي توګه د میرمنو او ماشومانو د حقونو په پایمال کیدو چوپه خوله دي.
طالبان څه باندې یوه میاشت کېږي چې په افغانستان کې واک ته رسیدلي او سره لدې چې د ټولشموله حکومت د جوړیدو ژمنه یې کړې وه خو د هغوي لخوا په سرپرستې کابینې کې تقریباً ټول طالبان او یا د هغوي پورې اړوند کسان دي. په سرپرستې کابینې کې نه یوازې دا چې نور قومونه پکې لږ دي بلکې هیڅ میرمنه پکې نشته.