په کابل او هلمند کې د طالبانو په دریو ځانمرګو بریدونو کې لږ تر لږه ۴۷ تنه ووژل شول او شاوخوا ۹۴ نور ژوبل شول.
د افغانستان د عامې روغتیا وزارت وایي چې په کابل کې په دوو ځانمرګو بریدونو کې ۳۷ تنه ووژل شول او شاوخوا ۹۴ نور یې ژوبل کړل.
بریدونه د افغانستان د پارلمان مخې ته شوي دي.
په هلمند کې بیا یو ځانمرګي برید ۱۰ تنه ووژل او همدومره نور یې ژوبل کړل. برید د ملي امنیت د ریاست مخې ته شوی دی.
طالبانو د دغو بریدونو مسولیت اخیستی دی.
د افغانستان جمهوري ریاست دا بریدونه په کلکه غندلي دي او بریدګر یې د بشریت ضد دښمنان بللي دي.
همداشان د ملګرو ملتونو مرستندویه دفتر یوناما،د امریکا سفارت او پاکستان د بهرنیو چارو وزارت په کابل او کندهار کې شوي بریدونه غندلي دي.