طالبانو د روژې په میاشت کې د اوربند په باب د افغانستان د دیني عالمانو سترتاسري شورا غوښتنه رد کړې او ویلي دي چې په دغه میاشت کې به دوی جکړو ته زور ورکړي.
د طالبانو په یوه اعلامیه کې چې د دغې ډلې د یو ویاند ذبیح الله مجاهد له خوا رسنیو ته استول شوې ویلي چې افغانستان لاهم د بهرنیو ځواکونو تر اشغال لاندې دی.
مجاهد په دغه اعلامیه کې ویلي " داچې جهاد عبادت دی، او د رژوې مبارکه میاشت د عبادت لپاره تر ټولو نورو وختو غوره ظرفیت لري، د بنده ګۍ او دالله په لاره کې د ستړیو ګاللو له پلوه د روژې میاشت د نورو ټولو میاشتو په نسبت ډيره وړ او مناسب زمانه ده، دمکې مکرمې دفتحي په شمول داسلام ستري غزاګاني په همدې مبارکه میاشت کي شوي نو د اسلامي امارت مجاهدین هم ان شاءالله کلک هوډ لري چې د روژې میاشتې په راتګ سره به نه تنها داچې جهاد نه دروي بلکې لا به هم قوت او پراختیا ورکوي".
د تیرې جمعې په ورځ د افغانستان د دیني عالمانو سرتاسري شورا غړو د افغانستان جمهوررئیس محمد اشرف غني سره په ارګ کې د کتنې وروسته په یو بیان کې په افغانستان کې په جګړه کې د ښکیلو خواوو څخه د روژې په میاشت کې د اوربند د ټینګدلو غوښتنه کړي وه.
د افغانستان د دیني عالمانو د سرتاسري شورا یو غړي مولوي محمد شفیع امریکا غږ ته وویل چې دیني عالمانو د خپل دیني مکلفیت له مخې د ښکیلو خواو څخه دا غوښتنه کړې ده.
مولوي شفیع وویل "د دې لپاره چې د روژې میاشت د عباداتو میاشت ده او د حرمت میاشت ده په دې کې ټول مسلمانان الله ته رجوع وکړي ، دغو اصولو ته په پاملرنې مونږ له جانبینو څخه دا خواهش کړی دی چې باید په دغه میاشت کې د تشنج د خون ریزي او مخالفتونو څخه لاس واخلي او اوربند وکړي نو دا به د ټول ملت په ګټه وي ".
د افغانستان د دیني عالمانو د سرتاسري شورا ویاند محمد قاسم حلیمي هم وایي چې د دوی دا پیغام یو دعوتي پیغام دي.
اټکل کیږي چې په افغانستان کې به روژه د دې اونۍ په وروستیو کې پیل شي خو لا تراوسه دا لا نه ده معلومه چې روژه به په کومه ورځ پیل شي.