ټاکل شوې چې د افغانستان د دولت او طالبانو ترمنځ د خبرو افتتاحیه غونډه د شنبې په ورځ سپتمبر ۱۲ (وږي ۲۲) وشي.
د افغانستان د جمهوري ریاست په یوه اعلامیه د سولې مذاکراتو د پيل لپاره د افغانستان دولت د مذاکره کوونکي پلاوي تیاري په ډاګه کړې ده او ویلي دي چې د دولت مذاکره کوونکی پلاوی د قطر پلازمینې دوحه ته سفر کولو ته تیار دی او سبا ته به لاړ شي.
د افغانستان د اسلامي جمهوريت پلاوي او طالبانو ډلې ترمنځ د مذاکراتو د پيل مراسمو کې، د ملي روغې جوړې عالي شورا رئيس ډاکتر عبدالله عبدالله، د بهرنيو چارو سرپرست وزیر محمد حنيف اتمر، د سولې په چارو کې د جمهوررئیس ځانګړی استازی عبدالسلام رحيمي او د سولې په چارو کې د دولت وزير سيد سعادت منصور نادري، د افغانستان د اسلامي جمهوريت په استازيتوب به ګډون وکړي.
طالبانو هم نن د پنجشنبې په ورځ اعلان وکړ چې د طالبانو د امریکا متحده ایالاتو ترمنځ د سولې د موافقې په اساس د «بين الافغاني مذاکراتو په افتتاحیه غونډه کې» ګډون ته چمتو دي.
د طالبانو د سیاسي دفتر ویاند ډاکتر محمدنعیم د پنجشنبې په ورځ سپتمبر ۱۰ په خپل ټویټر باندې ددې ډلې اعلامیه خپره کړې او ویلي یې دي چې د بین الافغاني خبربو افتتاحیه غونډه به د وږي د میاشتې په ۲۲ په قطر کې وشي.
دې ډلې ادعا کړې چې دوی «د مذاکراتو بهیر په ښه ډول پرمخ بیولو او د اسلامي ارزښتونو او هیواد د علیا منافعو په چوکاټ کې، د سرتاسري سولې او سوچه اسلامي نظام د رامنځ ته کیدو هوډ لري.»
د قطر د بهرنیو چارو وزارت د افغانستان د دولت او طالبانو ترمنځ د مذاکراتو د پیل نیټه تائید کړې او ویلي یې دي چې «د افغان مختلفو اړخونو ترمنځ مستقیم مذاکرات په افغانستان کې د دوامداره سولې د ټینګیدو پر لور یو بل ګام دی.»
د رویترز د رپوټ له مخې ټاکل شوې چې د افغانستان د دولت او طالبانو استازي د افتتاحیه غونډې وروسته د مذاکراتو د اجندا په هکله فني بحثونه پیل کړي.
دمخه تر دې د طالبانو ویاند ډاکتر محمد نعیم لیکلي وو چې د بندیانو خلاصون لا هم پاتې دی چې په وینا یې کار پرې روان دی او کله چې د بندیانو ازادولو بهیر بشپړ شي په وینا یې د دغه ډلې مذاکراتي ټېم خبرو ته چمتو دی.
د روانې وږې میاشتې پر ۳مه د افغان حکومت او طالبانو ترمنځ د بندیانو تبادله پای ته ورسېده او د رپوټونو له مخې شپږ طالب بندیان چې پر خلاصون یې کړکیچ رامنځ ته شوی و، قطر ته واستول شول. د وروستیو معلوماتو له مخې دغه شپږ تنه هم په قطر کې ازاد شوي دي او په نتیجه کې طالبانو مذاکرو ته چمتوالی اعلان کړی دی.