د متحده ایالاتو د بهرنیو چارو وزارت د سعودي عربستان څخه د غیر ضروري حکومتي مامورینو د ایستلو اعلان کړی.
د بهرنیو چارو د وزارت ویاند ټامي پیګوټ چارشنبه اکټوبر ۲۱ مه د اکس په حساب کې دا اعلان کړی او لیکلي یې دي چې په سعودي عربستان کې د امریکا د حکومت د غیر ضروري مامورینو او د هغوي له کورنیو غوښتل شوي چې په منظمه توګه لدې هیواد څخه ووځي.
ښاغلي پیګوټ همدارنګه لیکلي چې په سعودي عربستان باندې د حوثي یاغیانو چې ایران یې تر شا ولاړ دی، بریدونو زور اخیستی چې ملکي هوایي ډګرونه او نورې زیربناوې پکې په نښه شویدي.
د وزارت ویاند ویلي چې پدې بریدونو کې ملکیانو ته مرګ ژوبله اوښتې او هم یې د الوتکو پروازونه ګډوډ کړیدي.
ښاغلي پیګوټ لیکلي چې د بهرنیو چارو وزارت د پرسونل او د هغوي د کورنیو خوندیتوب او امنیت تر هر څه ډیر اهمیت لري او زیاتوي چې دا وزارت به د هغوي د خوندیتوب او ملاتړ لپاره ټول لازم اقدامات وکړي.
دا لومړی ځل ندی چې پدې تیرو څو میاشتو کې متحده ایالات په منځني ختیځ کې د خپلو سیاسي استازولیو څخه مامورین باسي.
د ایران پر ضد د امریکا او ایران د عملیاتو څخه وروسته هم متحده ایالاتو په سیمې کې خپل دیپلوماتیک حضور کم کړی و خو وروسته یې ګڼ شمیر حکومتي پرسونل بیرته هلته واستول.
سره لدې چې د بهرنیو چارو د وزارت ویاند یوازې د سعودي عربستان څخه د امریکا د حکومتي مامورینو وتلو خبر ورکړی خو د رویټرز خبري اژانس د څلور حکومتي سرچینو له خولې ویلي چې د خلیج ځینو نورو هیوادونو څخه هم ښایي د امریکا د حکومت یو شمیر مامورین او د هغوي د کورنیو غړي وایستل شي.
فورم \ دبحث خونه