د لاس رسي وړ اتصالات

امریکا د افغان دولت او طالبانو تر منځ سولې ته ژمنه ده – ټلرسن


د امریکا د بهرنیو چارو وزیر رکس ټلرسن په لومړي ځل د افغانستان د حکومت او وسله والو طالبانو ترمنځ د جوړجاړې په اړه ښکاره خبرې کړي دي.

د امریکا بهرنیو چارو وزیر ویلي چې په افغانستان کې د ناټو ماموریت حیاتي دی او امریکا د غوڅ ماموریت د ځواکونو تر څنګ ولاړه ده چې افغان پوځ وروزي او سلا مشورې ورکړي.

ښاغلي ټلرسن وویل چې دا ماموریت د ایتلاف د ګډو اهدافو لپاره ډېر مهم دی او باید دا خبره پخه شي چې افغانستان داسې پرمختګ وکړي چې د سیمې په امنیت کې ونډه ولري او د القاعدې او داعش په ګډون د نورو ترهګرو ډلو د ګواښونو ځواب ووايي.

نوموړي وویل په افغانستان کې د ناټو ماموریت په ژمنو کې د افغان حکومت او وسله والو طالبانو ترمنځ جوړجاړی هم شامل دی.

ښاغلي ټلرسن وویل "په افغانستان کې د سولې راوستلو لپاره د ناټو ایتلاف ژمن دی چې بلاخره د افغان حکومت او طالبانو ترمنځ جوړجاړی وشي، د ایتلاف ګټي خوندي شي او دا خبره یقیني شي چې افغانستان بیا د تروریزم لپاره په خوندي ځای بدل نشي".

ښاغلي ټیلرسن دا خبرې څو ورځې مخکې د ناټو د بهرنیو چارو وزیرانو په وروستۍ غونډې وکړې. دا لمړی ځل دی چې رکس ټلرسن د امریکا د بهرنیو چارو د وزیر په توګه د ناټو سازمان غړو ته د افغانستان د سولې په اړه خبرې کوي.

د ښاغلي ټلرسن خبرې پداسې حال کې کیږي چې امریکايي پوځي چارواکو بیا افغانستان ته د اضافي ځواکونو د لیږلو غږ کړی.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG