د افغانستان د انتخاباتو د خپلواک کمېسیون چارواکي وایي د ټولو ولایتونو نه کابل ته د انتخاباتو اړوند د حساسو موادو د انتقالیدو بهیر بشپړ شو.
د انتخاباتو د خپلواک کمیسیون ویاند عبدالعزیز ابراهیمي د یکشنبې په ورځ د اکتوبر پر۶مه امریکا غږ ته وویل، چې پدې موادو کې محافظتي کڅوړې او بایومیټریک وسایل شامل دي، چې د ملي او نړیوالو مشاهدینو او ناظرینو په حضور کې به خلاص او د پروسس لپاره به د معلوماتو د ثبت ملي مرکز ته واستول شي.
ابراهیمي وړاندې وویل چې د اتو ولایتونو د پایلو فورمې هم د معلوماتو د ثبت ملي مرکز ته استول شوي دي.
ښاغلي ابراهیمي همدارنګه وویل، چې له دغه جملې څخه ۶زره فورمونه د انتک، سکن او تصفیې په ګډون د ځينو پړاوونو تر تېرولو وروسته په سیستم کې داخلولو ته تیار شوي دي.
د ټاکنو کمېسیون وايي، ټاکل شوې ابتدايي پایلې، د روانې «تلې میاشتې پر۲۷مه» او وروستۍ پایلې به د راتلونکي لړم میاشتې پر ۱۶مه اعلان کړي.
ولسمشر محمد اشرف غني بیا تیره ورځ وویل، چې ټاکل شوې نوی ولسمشر په درې اونیو کې لوړه وکړي.