د امریکا د متحدو ایالتونو ولسمشر ډونالډ ټرمپ د مې په ۱۴ او ۱۵ بیجینګ ته د سفر نیت لري خو ددې سفر نه څو ورځې وړاندې، امریکا او چین لا هم د ایران، شمالي کوریا او تایوان په تړاو د دریځونو له امله له دوامدار اختلاف سره مخ دي.
د همدې کال په پیل کې د ایران پر ضد د امریکا په مشرۍ پوځي عملیاتو دا وښوده چې بیجینګ تر ډېره د ایراني تېلو پر وارداتو تکیه لري، چې د تهران لپاره د عوایدو مهمه سرچینه ده.
د اپرېل په ۲۴، د امریکا مالیې وزارت پر ځینو چینایي تصفیه خانو بندیزونه ولګول، چې ویل کېږي له ایران څخه تېل اخلي. پدې کې د "هنګلي پیټروکیمیکل" په نوم لویه تصفیه خانه هم شامله ده.
د چین د سوداګرۍ وزارت بیا د شنبې په ورځ خپلو شرکتونو ته امر وکړ چې دا بندیزونه له پامه وغورځوي.
د امریکا د بهرنیو چارو وزیر مارکو روبیو وویل، که شرکتونه د امریکا بندیزونه له پامه وغورځوي، نو واشنګټن به نور لارې چارې هم ولري، لکه ثانوي بندیزونه.
هغه زیاته کړه: "موږ دا اقدامات یوازې د سمبولیک هدف لپاره نه کوو. "
تر دې مخکې، امریکایي ځواکونو د ایران اړوند تېلو یوه بیړۍ چې چین ته روانه وه، ضبط کړه، او د امریکا مالیې وزارت خبرداری ورکړ چې که ځینې چینایي بانکونه د ایران سره مالي راکړه ورکړه کوي، نو ښايي پر دوي هم بندیزونه ولګول شي.
ولسمشر ټرمپ د اپرېل په ۱۵ وروسته له هغې چې ځینو رپوټونو کې ادعا وشوه چې بیجینګ تهران ته د هوايي دفاع سیستمونه ورکوي، وویل چې چین موافقه کړې چې ایران ته به وسلې نه ورکوي. چین دا تورونه په بشپړه توګه جعلي وبلل.
متحدو ایالتونو د پاکستان په منځګړتوب له ایران سره خبرې کوي، څو داسې تړون ته ورسېږي چې د تهران د اټومي وسلو هڅې او د هرمز تنګي کې سمندري تګ راتګ ازاد شي.
د ایران د بهرنیو چارو وزیر عباس عراقچي په بیجینګ کې د خپل چینایي سیال وانګ یي سره ولیدل. روبیو وویل هیله لري چې چین به ایران ته دا ووایي چې په تنګي کې بندیزونه د تهران نړیوال انزوا زیاتوي. وانګ یي بیا د “دښمنیو بشپړ درول” مهم وبلل.
چین د شمالي کوریا تر ټولو لوی سوداګریز شریک دی چې واشنګټن یې له مهمو ګواښونو څخه یو ګڼي. دواړه چین او شمالي کوریا هڅه کوي په ختیځه اسیا کې د امریکا نفوذ محدود کړي.
وانګ یي تېره میاشت پیونګ یانګ ته سفر وکړ او د شمالي کوریا له مشر کیم جونګ اون سره یې ولیدل.
تر دې لیدنې وروسته، کیم د روان کال خپل اووم بالستیک توغندی وازمویه. روبیو ویلي چې شمالي کوریا زرګونه لنډ واټن ویشتونکي توغندي لري چې په منځني ختیځ کې امریکایي اډو ته رسېدلی شي.
د امریکا د جګړې وزیر پیت هیګسیت وویل چې ایران اتومي وسلو ته د رسیدو دپاره د شمالي کوریا د ستراتیژۍ تقلید کوي، یعنې لومړی دودیز توغندي کاروي څو د فشار مخه ونیسي او ورو ورو اټومي وسلو ته ورسېږي.
بل مهم حساس ټکی د تایوان مسله ده، چې یو خودمختار ډیموکراتیک ټاپو دی او د امریکا اقتصادي او پوځي شریک ګڼل کېږي. وانګ یي ویلي چې تایوان د امریکا او چین ترمنځ “تر ټولو لوی خطر” ګڼل کیږي.
د امریکا د ۲۰۲۵ کال د ملي امنیت ستراتیژي کې ټینګار شوی چې واشنګټن د تایوان تنګي کې د موجود وضعیت د یو اړخیز بدلون ملاتړ نه کوي، او مهم لومړیتوب د احتمالي شخړې مخنیوی بولي.
چین تایوان خپله جلا شوې سیمه ګڼي او ژمنه یې کړې چې که اړتیا وي، په زور به یې بېرته له ځان سره یو ځای کړي
فورم \ دبحث خونه