د لاس رسي وړ اتصالات

ترکیې د سوریې د کردي ملیشو پر ضد د تازه اقدام کولو خبرداری وکړ


د ترکیې جمهور رئیس رجب طیب اردوغان

د ترکیې جمهور رئیس رجب طیب اردوغان، وایي که سوریې سره ددې هیواد د پولې نه ملیشه قواوې ونه ایستل شي، ترکیه قانوني حق لري چې بیا اقدام وکړي.

ښاغلي اردوغان د چهارشنبې په ورځ اکتوبر ۲۸ (لړم ۷) په پارلمان کې د خپل ګوند استازو ته په وینا کې وویل: "لکه څنګه چې له مونږ سره ژمنه شوې، که تروریستان له دغه ځایه ونه ایستل شي، مونږ قانوني حق لرو چې یو ځل بیا حرکت وکړو."

ترکي ځواکونو د ۲۰۱۶ کال راهیسې د سوریې په شمال کې یو لړ بریدونه کړي دي.

تیر کال په یو برید کې ترکیې د سوري یاغیانو په ملاتړ د سوریې د شمال ختیځ سرحد دننه تر ۱۲۰ کیلومترۍ پورې ځینې سیمې د کردي ملیشه ځواکونو څخه ونیولې. انقره دغه کردي ځواکونه یوه تروریستي ډله بولي.

د ترکیې لویدیځو متحدینو د انقرې دغه اقدام په پراخه توګه غندلی و، ځکه چې کردي ځواکونه د سوریې د دموکراتیکو ځواکونو اصلي جز دی چې د امریکا متحده ایالات یې ملاتړ کوي او د داعش ډلې په له منځه وړلو کې یې د امریکا سره مرسته کړې.

د ترکیې جمهور رئیس همداشان د ادلیب د سیمې د وضعیت په هکله اندیښنه ښودلې ده. دغه سیمه د ترکیې او روسیې ترمنځ د مارچ د میاشتې د اوربند د موافقې دمخه د سوریې د حکومتي ځواکونو او د هغو یاغیانو ترمنځ د سختو جګړو مرکز و چې ترکیه یې ملاتړ کوي.

د سوریې د جګړې د څار یوه ډله وایي د سوریې په شمال لویدیځ کې د هغو یاغیانو تر کنترول لاندې کمپ باندې چې ترکیه یې ملاتړ کوي د دوشنبې د ورځې په هوایي بریدونو کې لږ تر لږه ۳۵ کسان وژل شوي دي او یو شمیر نور ټپیان شوي دي.

ښاغلي اردوغان ددغه برید په هکله وویل: "د ادلیب په سیمه کې د سوریې د ملي اردو په ځواکونو (هغه ځواکونه چې ترکیه یې ملاتړ کوي) باندې د روسیې برید ښیي چې پدغه منطقه کې څوک دوامداره سوله نه غواړي."

ترکیه د سوریې د حکومت د مخالفو ځواکونو او روسیه د سوریې د جمهور رئیس بشارالاسد د حکومت ملاتړ کوي.

د سوریې کورنۍ جګړه شاوخوا لس کاله مخکې پیل شوه او تر اوسه په کې شاوخوا ۵۰۰ زره کسان وژل شوي او شاوخوا شپږ میلیونه کسان بیځایه شوي دي.

XS
SM
MD
LG