د لاس رسي وړ اتصالات

بریتانیا: ډېر افغان ژباړونکي به له افغانستان څخه وباسو 


افغان ژباړونکي

د بریتانیا د دفاع وزارت وايي چې د یو دولتي پلان په اساس به ډېر افغانان چې د بریتانوي‌ ځواکونو سره یې کار کړی او په ځانګړي ډول ژباړونکي له افغانستان څخه وباسي.

د بریتانیا د دفاع وزیر بن والس وویل: «زه فکر کوم چې د دغو خلکو سره درېدل ښه کار دی.‌ هغوی زموږ په اړه ډېرې قربانۍ ورکړې او موږ هم ورته کار کوو.»

د بریتانیا د حکومت د دغې تګلارې په اساس د بریتانوي ځواکونو ټولو مخکنیو او اوسنیو افغان همکارانو ته چې ژوند یې په خطر کې دی، لومړیتوب ورکول کیږي چې له خپلو کورنیو سره بریتانیا کې مېشت شي.

د بریتانیا د دفاع وزیر وویل چې بریتانیا ته له رسېدو وروسته به له هغوی سره مرستې کیږي. هغه وویل: «هیله لرم چې د بریتانیا خلک هم د هغوی ننګه وکړي ځکه چې هغوی زموږ د ښځو او سړیو لپاره لوی خطرونه ګاللي دي.»

دا په داسې حال کې ده چې د امریکا متحدو ایالتونو هم د امریکايي ځواکونو افغان ژباړونکو او کارکوونکو ته د مهاجرت د ځانګړې ویزې ورکولو بهیر ګړندی کړی دی.

د امریکا د بهرنیو چارو وزارت وایي چې شاوخوا ۱۸۰۰۰ افغانانو د مهاجرت ځانکړې ویزې ته عریضې کړې او منتظر دي چې ترلاسه یې کړي.‌

د امریکا د متحدو ایالتونو قانون جوړوونکو هم ژمنه کړې ده چې د امریکايي ځواکونو افغان ژباړونکي به له افغانستان څخه وباسي او که اړتیا پیدا شوه د ویزې د ترلاسه کولو پر مهال به یې بحرین، کویټ،‌ امارات او یا کوم بل هېواد ته انتقال کړی.

تر دې مخکې یو شمېر افغانانو چې په بلخ ولایت کې یې له جرمنیانو سره کار کړی، اعتراض کړی و او د جرمني له حکومت څخه یې غوښتي وو چې دوی ته پناه ورکړي. هغوی ویل چې ژوند یې په خطر کې دی.

XS
SM
MD
LG