د افغانستان لپاره د ملګرو ملتونو استازولۍ (یوناما) د یکشنبې په ورځ (اګست ۲۰) د سرپل ولایت د صیاد ولسوالۍ د میرزا ولنګ په دره کې د ۳۶ کسانو په اړه د خپل تحقیقي ریپوټ جزئیات خپاره کړل.
په ریپوټ کې راغلي، چې وسلهوالو طالبانو او هغو کسانو چې ځانونه داعش بولي، د اګست میاشتې په دریمې او پنځمې نیټې د سرپل د صیاد ولسوالۍ په میرزا ولنګ درې کې د برید پر مهال ۳۶ تنه وژلي، چې په کې ملکي افغانان او تسلیم شوي ولسي پاڅون کوونکي شامل دي.
له دې مخکې د سرپل سیمهییزو چارواکو هم په میرزا ولنګ کې د ۳۶ کسانو وژل تائید کړي او ویلي یې دي، چې ښايي د وژل شوو کسانو شمیر له دې پورته وي.
د دولت د وسلهوالو مخالفینو له خوا د سرپل د میرزا ولنګ درې له نیولو وروسته د سرپل والي ادعا کړې وه، چې په سیمه کې ۵۲ ملکي کسان د وسلهوالو له خوا وژل شوي دي.
د دعې پیښې مسولیت د داعش ډلې منلی دی.
خو وسلهوالو طالبانو ویلي، چې په میرزا ولنګ کې یې ۲۸ تنه ولسي پاڅونکوونکي وژلي دي.
خو د یوناما تحقیق ښيي، چې لږ تر لږه ۱۸ کسان د اګست میاشتې په پنځمه نیټه هغه مهال وژل شوي، چې د کلي خلک له سیمې څخه د تیښتې په حال کې وو.
د یوناما مشر تدامیچي یاماموتو د ملکي افغانانو او د ځايي ملیشو وژنه غندلې ده او ویلي یې دي "د دغې وژنې او جرمونو عاملین باید ځواب ویونکي واوسي".
یوناما دغه راز ویلي، چې د دغې ادارې د بشري حقونو ډلې، د هغو ادعاو په اړه چې ګواکې په دې سیمه کې له خلکو سرونه پري شوي او له ښځو سره جنسي تاوتریخوالی شوی دی، کره اسناد نه دي موندلي.
تیره اونۍ د سېشنبې په ورځ افغان امنیتي ځواکونو د دولت له وسلهوالو مخالفینو څخه د میرزا ولنګ دره بیرته ونیوله.
د افغانستان دفاع وزارت ادعا کړې چې د دغې درې د بیرته نیولو پر مهال یې وسلهوالو مخالفینو ته درنه مرګژوبله اړولې ده.