متحده ایالاتو دوشنبه ډسمبر ۲۳ ( مرغومي درییمه) په پاکستان کې په نظامي محکمو کې د هغو ملکیانو محاکمه کیدو باندې ژوره اندیښنه ښودلې چې د تیر کال مې میاشتې نهمې مظاهرو کې یې لاس درلود.
د امریکا د بهرنیو چارو وزارت په یوې اعلامیې کې ویلي چې په پاکستان کې نظامي محکمې قضایي خپلواکي او شفافیت نلري او په قانوني توګه د دوسیو طی مراحل کیدو ضمانت هم نشي پکې کیدلی.
د پاکستان د پوځ عامه اړيکو ادارې د روانې ډسمبر میاشتې په ۲۱ مې اعلان وکړ چې نظامي محکمو د ۲۰۲۳ کال د مې مياشتې د نهمې نېټې په پېښو کې ککړو ۲۵ کسانو ته له دوو کلونو څخه تر ۱۰ کلونو پورې بېلا بېلې سزاګانې ورکړیدي.
د پوځ په بیان کې ادعا شوې وه چې محکوم شویو کسانو ته ټول قانوني حقونه ورکړل شوي او قانوني شرایط پوره کړل شوي وو.
پدې محکمو کې د هغو کسانو دوسیو باندې پریکړې صادرې شوې چې د پخواني صدراعظم عمران خان په پلوۍ یې مظاهرې کولې خو وروسته دا مظاهرې خونړۍ شوې او د پولیسو په ګډون پکې ګڼ شمیر کسان ووژل شول.
مظاهره چیانو همدرانګه د پاکستان په پوځي تاسیساتو یرغل وکړ.
د پاکستان د پوځ په اعلامیې کې دا هم ویل شوي چې د ځینو تورنو کسانو قضیې د ترهګرۍ ضد محکمو کې هم روانې دي او د هغوی د قانوني پروسې تر بشپړېدو وروسته به دغه محکمې یې په اړه پریکړه وکړي.
پاکستان تحریک انصاف (پي ټي ای) ګوند دې سزاګانو ته په غبرګون کې ويلي دي چې د نظامي محکمو دایرول د پاکستان له اساسي قانون او بنيادي بشري حقونو څخه سرغړونه ده.
د امریکا د بهرنیو چارو وزارت په اعلامیې د پاکستاني چارواکو څخه غوښتل شوي چې د عادلانه محاکمې لپاره دې د هیواد اساسي قانون له مخې د خپلو اتباعو د حقونو درناوی وکړي.
د متحده ایالاتو تر څنګ اروپایي اتحادیې هم د پاکستان په نظامي محکمو کې د ملکیانو په محاکمه کیدو اندیښنه څرګنده کړې.
اروپایي اتحادیې په یوې اعلامیې کې ویلي چې د محکمو دا پریکړې د مدني او سیاسي حقونو لپاره په نړیوال کنوانیسیون کې د پاکستان مکلفیتونو سره په ټکر کې دي.
د دې کنوانیسیون له مخې هیوادونه مکلف دي چې افرادو ته د عادلانه او ښکاره محاکمه کیدل په آزادې، بې پرې او وړ محکمې کې برابر کړي او دا چې افراد پکې کافي او اغیزمن قانوني استازولي ولري.
فورم \ دبحث خونه