د لاس رسي وړ اتصالات

امریکا د حقاني شبکې د مشرانو پر سر نوې جایزې ایښي


چپ لاس ته د حقاني شبکې اوسنی مشر سراج الدین حقاني او ښي لاس ته یې پلار جلال الدین حقاني دی.

د امریکا د بهرنیو چارو وزارت د حقاني شبکې د مشر سراج الدین حقاني پر سر اېښودل شوې جایزه دوه کړه او د څلورو نورو مشرانو د پتې په اړه د معلوماتو په بدل کې د شلو میلیونو ډالرو نوې جایزې اعلان کړې.

د امریکا د بهرنیو چارو وزارت په یوې اعلامیي کې چې د اګست په شلمه خپره شوه، د حقاني شبکې د مشر سراج الدین حقاني پر سر د هغه په اړه د معلوماتو په بدل کې د ۵ میلیونو ډالرو اېښودل شوې جایزه لسو میلیونو ته لوړه کړه.

وزارت دغه راز د حقاني شبکې د څلورو نورو مشرانو د ځای ځایگي په اړه د دقیقو معلوماتو پر ورکولو د ۵ میلیونو ډالرو نوی جایزه هم وټاکله، یانې د هر یو پر سر ۵ میلیونه ډالره چې ټول یې شل میلییونه کیږي.

سراج الدین حقاني د حقاني شبکې اوسنی مشر دی
سراج الدین حقاني د حقاني شبکې اوسنی مشر دی

په دغو څلورو کسانو کې د حقاني شبکې د مشر سراج الدین ورور عزیز حقاني، خلیل الرحمن د سراج الدین کاکا، یحیی حقاني د سراج الدین اوښی او عبدالروف ذاکر د حقاني شبکې د ځانمرګو بریدونو د عملیاتي چارو مشر شامل دي.

د حقاني شبکې چې اوس یې مشري سراج الدین حقاني کوي، د ۱۹۷۰ کلونو په وروستیو کې جوړه شوه. دغه شبکه اوس په پاکستان کې مېشته ده چې د امریکا د بهرنیو چارو وزارت د اعلامیې له مخې له طالبانو، القاعدې او په سیمه کې له نورو ترهګرو ډلو او سازمانونو سره نژدې اړیکې، ملګرتیا او همکاري لري.

حقاني شبکه چې وړاندې د پاکستان په شمالي وزیرستان کې مېشته وه، په کابل او د افغانستان په نورو ډېرو برخو کې پر نړیوالو او افغان ځواکونو باندې یې ګڼ ځانمرګي ډله اییز او نور وسله وال بریدونه کړي دي .

امریکا حقاني یوه وژونکې او ترهګره شبکه بولي چې په کابل کې د امریکا پر سفارت او د ایساف پر مرکزي قوماندانۍ باندې یې د بریدونو مسولیت یې هم اخیستی و.

د امریکا په سفارت باندې برید له یوې لوړې جوړېدونکې ودانۍ نه و شو چې شاوخوا ۱۹ ساعتونه یې دوام وکړ، وسله وال ځانمرګي برید کر دغې ودانۍ ختلي او پر سفارت یې ډزې کولې.

د امریکا د بهرنیو چارو وزارت د ۲۰۱۲ کال د ډیسمبر په میاشت کې د حقاني شبکه د یوه ترهګر سازمان په توګه وپېژنده، د حقاني شبکه په اصل کې د پخواني شوروي اتحاد پر ضد د مجاهدینو د یو نومیالي قومندان جلال الدین حقاني جوړه کړې چې په خټه د افغانستان د خوست د ولایت اوسېدونکی دی .

امریکايي چارواکي نه وايي چې دغه کسان په کومو سیمو کې دي او یا هم کومو سیمو ته تګ راتګ کوي، خو تېر کال نامعلومو کسانو د دغې شبکې یو بل مشر نصیرالدین حقاني د پاکستان په پلازمېنې اسلام اباد کې په ډزو وواژه چې هېچا یې مسولیت ونه مانه.

تراوسه د امریکا د جایزو د دغه نوي اعلان په اړه طالبانو څه نه دي ویلي.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG