د امریکا د متحده ایالاتو د دفاع وزارت پلان لري چې د افغانستان امنیتي ځواکونه د افغانستان پر ځای په بل یوهیواد کې وروزي چې د افغانستان د دفاع وزارت یې هم هرکلی کړی.
د امریکا د وسله والو ځواکونو عمومي لوی درستیز جنرال مارک میلي تیره ورځ، پنجشنبه مې ۶ (غوایيي۱۶) د دفاع په وزارت کې خبریالانو ته وویل چې په یو شمیر ځایونو کې د افغان امنیتي ځواکونو د روزنې په طرحو کار روان دی خو تر اوسه سل په سلو کې څرکنده شوې نده چې دا روزنې به چیرته کیږي.
جنرال میلي پدې هکله د یوې پوښتنې په ځواب کې وویل، " دا امکان لري. غواړم ووایم چې ډیرې لارې شته دي خو تر اوسه مو لا پرېکړه نده کړې. خو کله مو چې نهایي طرحې جوړې کړې، د دفاع وزارت ته به یې د منظورۍ لپار وسپارو. "
هغه وویل چې د امریکا متحده ایالات د افغان امنیتي ځواکونو د ملاتړ وړتیا لري او اوس مهال پدې طرحو کار روان دی.
د افغانستان د ملي دفاع وزارت د امریکا ددې پریکړې هرکلی کړی.
د وزارت د ویاند مرستیال امریکا غږ ته وویل چې د شک پرته د افغان امنیتي ځواکونو سره د نړیوالې ټولنې او په ځانګړې توګه د امریکا مالي مرستي، تخنیکي او د روزنې مرستې اغیزناکې دي.
هغه زیاته کړه، " که هغوي د افغانستان د امنیتي او دفاعي ځواکونو د روزنې د دوام پریکړه وکړي، د شک پرته چې د افغانستان حکومت او د دفاع وزارت به یې هرکلی وکړي.
د جنرال میلي ددې څرګندونو نه وړاندې د امریکا د مرکزي قوماندانۍ قوماندان جنرال کینت مکینزي هم ویلي و چې امریکا د لیرې څخه د افغان امنیتي ځواکونو د روزنې د لارو چارو په لټه کې دی.
د امریکا متحده ایالات پداسې وخت کې د افغان امنیتي ځواکونو په روزنې خبرې کوي چې د افغانستان لپاره د اروپا، ناټو، آلمان، فرانسې، ایټالیا، ناروې، بریتانیا او امریکا متحده ایالاتو په ګډې اعلامیې کې د افغان امنیتي ځواکونو په ملاتړ موافقه کړې. دوي ویلي دا کار ځکه کوي چې هغوي (افغان امنیتي ځواکونه) له خپل هیواد څخه دفاع وکړای شي.