د ټرمپ د مهاجرت د سختې تګلارې له ویرې زرګونه تښتېدلي کډوال اوس په کاناډا کې له یو لړ نویو ستونزو سره لاس او ګریوان شوي دي.
کډوال په کاناډا کې د مهاجرت له سخت قانون، د کار او دایمي سرپناه له نشتوالي او ماشومانو ته یې د تعلیمي امکاناتو له کموالي سره مخامخ دي.
په کاناډا کې د پناه غوښتونکو د اسنادو ارزونه او څېړنه اوس ډېر وخت نیسي. رویټرز وايي د کاناډا د کډوالو د قضايي برخې د ۱۲۷ قاضیانو له ډلې یې نیمایي لا د ۲۰۱۵ او ۲۰۱۶ کلونو د قضیو په اړه غونډې نه دي کړي.
د کډوالو د اوسېدو او د هغوی د قضیو د حل لپاره د قاضیانو غونډې اساسي شرط بلل کیږي. که د کډوالو وضعیت معلوم نه وي هغوی نه کار کولی شي، نه مالي مرستې ترلاسه کولی شي او نه هم زده کړې کولی شي.
یوازې د ۲۰۰۷ کال د جنورۍ په میاشت کې ۳۵۰۰ کسانو په کاناډا کې پناه غوښتې او داسې ویل کیږي چې کاناډا د کډوالو د قضیو د حل لپاره پوره کارکوونکي نلري.
دغه حالت ته په کتو داسې اندېښنې شته چې د نویو کډوالو د پناه غوښتنې قضیې شاید میاشت او کلونه ونیسي.
د ټرمپ په مشرۍ امریکا کې د نوي حکومت په راتګ سره په کاناډا کې د کډوالو شمېر زیات شوی دی او ویل کیږي چې له ۲۰۱۱ کال راپدېخوا سږکال تر ټولو ډېرو خلکو په کاناډا کې پناه غوښتې دي.