د امریکا متحدو ایالتونو د ملګرو ملتونو د «کوواکس» پروګرام له لارې پاکستان ته د کرونا ویروس ضد ۲.۵میلیون ډوزه واکسین ورکړل.
د امریکا د بهرنیو چارو وزیر انتوني بلینکن په خپل ټویټر کې لیکلي چې امریکا په نړۍ کې د کرونا ویروس وبا ختمولو ته ژمنه ده.
هغه لیکلي دي:« پاکستان ته د کرونا ویروس ضد د مودرنا ۲.۵ میلیون ډوزه واکسین ورکول زموږ دوامداره دوستي او د کویډ سره په مبارزه کې زموږ همکاري ښکاره کوي.»
د پاکستان د پلان جوړونې او پراختیا وزیر اسد عمر چې د کرونا ویروس سره د مبارزې د مشترکې کمېټې مشر هم دی، تائید کړي چې د امریکا د واکسین مرسته ور رسېدلې ده.
په اسلام اباد کې د امریکا سفارت ویلي دي چې دا واکسینونه یې تېره ورځ جولای ۲ (چنګاښ۱۱) د پاکستان حکومت سپارلي دي.
د امریکا د سفارت په اعلامیې کې راغلي دي چې دا مرسته د کرونا ضد د هغو ۸۰۰ میلیون ډوزه واکسین د مرستو لړۍ ده چې امریکا یې له نړۍ سره ژمنه کړې ده.
اعلامیه وايي د کرونا ضد واکسین په مرستو سربېره، امریکا پاکستان ته د کرونا ویروس د مرستو تر نامه لاندې پاکستان ته ۵۰۰ میلیون ډالر مرسته هم ورکړې ده چې د پاکستان له حکومت سره د ملګرتیا څرګندوی دی.
په پاکستان کې د کرونا ویروس له کبله تر دې دمه څه باندې ۲۲۰۰۰ کسان مړه شويدي.
