ملګري ملتونه وایي يمن ته نن چارشنبه، مارچ ۳۱ (وري ۱۱) د کرونا ضد ۳۶۰ زره ډوزه واکسین ورسید.
د اسټرا زینیکا واکسین د عدن بندري ښار ته ورسید چې اوس د یمن موقتي پایتخت هم دی. د یمن په نړیواله سطح پیژندل شوی حکومت په همدې ښار کې دی ځکه حوثي یاغیانو په ۲۰۱۴ کال کې د پایتخت صنعا نه وشاړه.
د ملګرو ملتونو د ماشومانو د ملاتړ ادارې (یونسیف) په یوې اعلامیې کې ویلي چې دغه واکسین د کواکس د پروګرام پر اساس یمن ته ورکړل شوی. د روغتیا نړیوال سازمان دا پروګرام پدې خاطر پیل کړی چې بې وزله هیوادونو ته د کرونا ضد واکسین په وړیا توګه ورکړل شي.
د یونسیف په اعلامیه کې ویل شوي چې په روان ۲۰۲۱ میلادي کال کې به یمن ته ۱.۹ میلیونه ډوزره د کرونا ضد واکسین ورکړل شي.
په یمن کې د کرونا ضد تازه پیښې دومره ډیرې شوي چې د هغه هیواد د کرونا سره د مبارزې کمیټې له حکومت غوښتي و چې اضطراري حالت دې اعلان کړي.
یمن شاوخوا ۳۰ میلیونه نفوس لري. د دې هیواد رسمي ارقام ښیي چې هلته ۴ زره کسان تر اوسه د کرونا په ویروس اخته شوي او ۸۳۶ یې مړه کړي خو د روغتیایي چارو مبصرین وایي چې دا ارقام تر دې لوړ دي.
په یمن کې چې د عربي نړۍ تر ټولو بې وزله هیواد دی، څه باندې ۶ کاله کیږي چې کورنۍ جګړه روانه ده.
حوثي شعیه یاغیانو چې ایران یې ملاتړ کوي، په ۲۰۱۴ کال کې د حکومت پر ضد بغاوت وکړ. پایتخت صنعا او د هیواد ډیرې شمالي برخې یې د حکومت نه وینولې.
د سعودي عربستان په مشرۍ ائتلافي ځواکونو په ۲۰۱۵ کال په یمن کې نظامي مداخله وکړله او د حوثیانو په مرکزونو یې هوایي بمبارۍ پیل کړلې.
د یمن په کورنۍ جګړې کې زرګونه خلک تر اوسه وژل شوي چې اکثریت یې ملکیان دي.