د افغانستان د ولسمشر د اقتصادي برخې ستر سلا کار عمر زاخیلوال وايي چې ولسمشر اشرف غني او پخواني ولسمشر حامد کرزي پر یو لړ مسایلو باندې خپلمنځي اختلافات د خبرو اترو له لارې حل کړل.
دواړو مشرانو د جمهوري ریاست په ماڼۍ کې سره ولیدل او پر هغو غلط فهمیو یې رڼا واچوله چې د ښاغلي زاخلیوال په خبره د یو شمیر مغرضینو له خوا پیدا شوې وې.
ښاغلي زاخیلوال هغه گونگسي او تبصرې بې بنسټه وگڼلې چې گواکې ښاغلی کرزی د حکومت د نسکورلو هڅې کوي. هغه وویل چې ښاغلي کرزي ولسمشر غني ته د خپل بشپړ ملاتړ ډاډ ورکړ.