د امریکا متحدو ایالتونو په یمن کې د حوثي یاغیانو تر کنترول لاندې سیمو کې بېرته خپلې بشري مرستې پیل کړي.
ملګري ملتونه وايي چې جګړې او قحطۍ په یمن کې لوی بشري بحران جوړ کړی دی.
د مخکني ولسمشر دونالډ ټرمپ ادارې د حوثي یاغیانو تر کنترول لاندې سیمو ته بشري مرستې بندې کړې وې او ویلي یې وو چې یاغیان له دغو مرستو ګټه اخلي.
د امریکا متحدو ایالتونو له ۲۰۱۹راپدیخوا له یمن سره څه باندې ۱.۵میلیارد ډالر بشري مرستې کړي دي.
په همدې حال کې د ولسمشر بایډن یو ځانګړي سلاکار تم لیندرکینګ ویلي دي په داسې حال کې چې د یمن د جګړې ختمولو لپاره د سیمې په کچه دپلوماتیکې هڅې روانې دي، حوثي شیعه یاغیان په جګړې ډېر تمرکز کوي چې ډېرې سیمې ونیسي.
نوموړي وویل له بدغه مرغه چې حوثيانو د مرکزي ولایت مارب نیول خپل لومړیتوب ګرځولي چې د تعجب خبره ده.
هغه زیاتوي چې حوثي شیعه یاغیانو ته د اوربند وړاندیز شوی و او ترې غوښتل شوي وو چې مثبت ځواب ووايي.
د امریکا حکومت یوه میاشت مخکې اعلان وکړ چې په یمن کې د سعودي په مشرۍ د ایتلاف د پوځي عملیاتو ننګه نکوي. د بشري حقونو ځینې سازمانونه ایتلاف تورنوي چې په ملکي سیمو بمبارۍ کوي.
د مخکني ولسمشر دونالډ ټرمپ حکومت د دغه ایتلاف ننګه کوله.
د حوثي یاغیانو د ایران په مرسته په ۲۰۱۴کې د یمن پېژندل شوی او رسمي حکومت لېرې کړ او مرکز صنعا یې ونیوله. له هماغې را وروسته د دغې ډلې په ضد د ایتلاف عملیات روان دي.
په یمن کې د روانو جګړو له کبله څه باندې ۱۰۰زره کسان وژل شوي او تر درې میلیون زیات نور خلک بېځایه شوي دي.