د افغانستان د جمهوري ریاست د ویاند مرستیال فایق واحدي امریکا غږ ته وویل چې د ترکیې جمهور رئیس کابل رارسیدلی دی او ژر به د افغانستان د جمهور رئیس سره یو ګډ خبري کنفرانس ته وینا وکړي.
په پام کې ده، چې د ترکيې جمهور رئیس رجب طيب اردوغان به په کابل کې د خپلې استوګنې په وخت د افغان حکومت د نورو لوړ پوړو چارواکو سره هم وویني او د دواړو هیوادونو د اړیکو په پراخیدلو سره خبرې وکړي.
افغان چارواکي وایي چې ټاکل شوې ده چې کابل ته د ترکیې د جمهور رئیس ددغه سفر په وخت به هغه د افغانستان د جمهور رئیس سره د دواړو هیوادونو ترمنځ یو ستراتيژيک امنيتي تړون هم لاسليک کړي.
افغانستان او ترکیه ترمنځ د دیپلوماتیکو اړیکو ټینګیدل یوې پیړۍ نه اوړي.
په ۲۰۰۱ کال کې په افغانستان کې د طالبانو د واکمنۍ د پای ته رسیدلو وروسته دغه هیواد د امریکا په مشرۍ په نړیوال ائتلاف کې برخه واخستله او په سلګونو عسکر یې افغانستان ته راولیږل او د ایساف د ځواکونو په ترکیب کې په کابل کې ددغو ځواکونو لومړنۍ قوماندانۍ هم د ترکیې عسکرو په غاړه وه.
ترکيې په تيرو ديارلسو کلونو کې هم د افغان پوځ او پولیسو په روزنه کې هم ونډه اخیستی ده.
ترکیه په اوس وخت کې په افغانستان کې د ناټو په مشرۍ د ایساف د ځواکونو په چوکاټ کې تر ځلورسوه عسکر لري.