د لاس رسي وړ اتصالات

ولسي جرګې د اجرايي رئیس د دفتر بودیجه ونه منله


د ولسي جرګې غړو د چهارشنبې په ورځ د افغانستان کلنۍ بودیجه تصویب کړه.

قانون جوړونکو د څه باندې ۴۳۶ میلیارد افغانیو بودیجه تصویب کړه خو د اجرایي ریاست لپاره ځانګړې شوې بودیجه یې وځنډوله او د پخواني ولسمشر د سلاکارانو امتیازونه یې رد کړل.

ولسي جرګې د چهارشنبې په ورځ د ۱۳۹۴ لمریز کال لپاره د افغانستان ملي بودیجه له یو لړ بدلونونو وروسته، تصویب کړه.

ټوله بودیجه څه باندې ۴۳۶ میلیارد افغانۍ (شاوخوا ۷ میلیارد امریکايي ډالره) کیږي چې ستره برخه یې د هېواد امنیتي لګښتونو ته ځانګړې شوې ده.

د افغانستان ملی بودیجه په دوو برخو ویشل شوې ده. څه باندې ۲۸۳ میلیارد افغانۍ عادي بودیجې او ۱۵۵ میلیارد افغانۍ پرمختیايي بودیجې ته ځانګړي شوي دي.

د بودیجې ډیره برخه له بهرنېو مرستو سرچینه اخلي خو اټکل کیږي چې د افغانستان د کورنېو عوایدو کچه به هم تر یو میلیارد ډالر لوړه وي.

اجرائیه ریاست

ولسي جرګې د چهارشنبې په غونډه کې د حکومت د اجرايي رئیس د دفتر لپاره بیله شوې بودیجه وځنډوله.

د جرګې استازو وویل چې تراوسه یې د دغه ریاست اداري تشکیل تصویب کړی نه دی، نو ځکه یې بودیجه نشي تصویبولاې.

د ولسي جرګې منشي، سید اکرام وویل د قانون له مخې د هرې ادارې مالي بودیجه د اړوندې ادارې له اداري تشکیل وروسته، تصویبیږي.

ښاغلي اکرام د امریکا غږ اشنا راډیو ته " د اجرايي ریاست لپاره ۱۶۵ میلیونه افغانۍ کلنۍ بودیجه ټاکل شوې وه چې جرګې وځنډوله. "

ده وویل همدا چې ولسي جرګه د اجرايي ریاست تشکیل تصویب کړي، د بودیجې پر تصویبولو به هم خبرې او غور وکړي، خو لا معلومه نه ده چې د اجرایي ریاست تشکیل به کله ولسي جرګې ته وړاندې شي.

د افغانستان د ملي یوالي حکومت اجرايي ریاست د ولسمشر غني د فرمان له مخې رامنځته شوې دی.

د پخواني ولسمشر سلاکاران

په همدې حال کې ولسي جرګې د پخواني حکومت وزیرانو او د نورو لوړ پوړیو چارواکو د معاشونو لپاره ځانګړې شوې بودیجه هم رد کړه.

د جرګې لومړي منشي سید اکرام امریکا غږ ته وویل " دا د ۱۲۰ میلیونه افغانیو بودیجه وه چې د پخوانیو وزیرانو، مشاورینو او نورو مستقلو ریسانو ته تر پنځو کلونو لپاره د هغوی د معاشونو ۸۰ فیصده ورکوله، دا فرمان ولسمشر کرزي ورکړی وی، چې د اساسي قانون خلاف کار و او موږ هم دغه بودیجه رد کړ."

د تصویب شوې بودیجې ۴۴.۱ فیصده د امنیتي او ۱۴،۲ فیصده یې د بیخ بنايي پروژو لپاره ځانګړې شوي دي.

د افغانستان کلنۍ بودیجه تر ډېره په نړیوالو مرستو ولاړه چې د ښاغلي اکرام په خبره، د انکشافي برخې ۷۰ فیصده یې نړیوال ورکوي.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG