د سولې دپاره د جمهور رئیس محمد اشرف غني استازی وایي په افغانستان کې د سولې دپاره په سیمه کې اجماع موجوده ده او باید په ملي سطحه هم موجوده اوسي.
محمدعمرداودزی چې د سولې د عالي شورا د دارالانشا رئیس هم دی، نن یکشنبې (فبروري۳) د متحدعرب ارماتو نه په تیلیفون امریکاغږ/اشناتلویزیون ته وویل چې د افغانستان د سولې د تامین او د جګړې د ختمولو دپاره سیمه ایزه اجماع شته، خو د جګړې د ختم دپاره په افغانستان کې ملي اجماع هم مهمه ده. عمرداودزی وایي ټول باید د دولت د موجوده طرحې ملاتړ او د دولت په مشرۍ هلې ځلې وکړي، ځکه دولت د افغانانو په رایو ټاکل شوی او د ټول افغانستان استازیتوب کوي.
خو د افغانستان د پخواني جمهور رئیس حامدکرزي دفتر نن (یکشنبې فبروري۳) په یوه اعلامیه کې ویلي په فدراتیفه روسیه کې میشتې افغان ټولنې ګڼ شمیر افغان سیاستوالو ته د بین الافغاني خبرو په نوم غونډې ته بلنه ورکړې.
اعلامیه کې ویل شوي چې اوسنیو شرایطو ته په کتو سره چې د سولې هیلې را پیدا شوې دي، دا به د سولې د بین الافغاني خبرو لپاره لومړنی ګام وي، او په دغې غونډه کې د افغانستان د نظام پر ساتنې او پیاوړي کولو ټینګار وشي.
په ورته وخت کې د جمهوري ریاست کاندید حنیف اتمر په ټویټر لیکلي دي چې د هیواد د رهبرانو له يوې ډلې سره د مسکو غونډه کې ګډون کوي. ښاغلي اتمر لیکلي د حکومت څخه هم هیله لري چې د سولې بهير ته له تنګې حکومتي کړکۍ ونه ګوري.
د ښاغلي داودزي پوره مرکه دلته اوریدلی شئ:
جمهور رئیس محمداشرفغني وايي پخوانۍ کیسې به تکرار نه شي، دولت د راتلونکو سلو کلنو لپاره مبارزه کوي با عزته سوله غواړي او هغه سوله ورته د منلو ده چې طالبان د افغانستان اساسي قانون، دفاعي او امنیتي ځواکونه ومني.
