نوموړی وايي، د ګلانو د کر ګټه له کوکنارو او نورو کښتونو څو چنده ډېره ده، ځکه له لږې ځمکې ډېر حاصل لاسته راوړي او هم یې بازار ښه دی.
مطیع الله د کندوز ښار د چله مزار اوسېدونکی دی. هغه وايي تقریبا له شلو کالونو راپدېخوا د ګلانو په کرلو او روزلو بوخت دی.
د هغه په وینا د ګلانو کرل د نورو کښتونو او کاروبارونو په پرتله ډېره ګټه لري. د هغه په خبره د ګلانو کر له لارې له ۶۰۰ متره مربع ځمکې په کال کې تر ۳ لکو افغانیو عاید لاسته راوړي.
د مطیع الله په وینا د ګلانو کاروبار د ګټې تر څنګ د هغه روح او روان خوښ ساتي، نو همدې خاطر یې کري او روزي.
نوموړی وايي د ګلانو کر له کوکنارو غوره دی او هم یې ګټه زیاته ده، ځکه د کرولو لپاره ډېرې لږې ځمکې ته اړتیا لري او هم یې کار اسانه دی.
دی وايي کروندګر دې د کوکنارو زهرجن بوټي پرځای د ګلانو او نور کښتونو کرلو ته مخه کړي.