د امریکا د متحدو ایالتونو ولسمشر ډونالد ټرمپ څو شیبې دمخه په سپينې ماڼۍ کې د افتخاري مډال ورکولو په مراسمو کې ګډون وکړ. ولسمشر په دغو مراسمو کې پر ایران د امریکا او اسراییل په ګډو عملیاتو کې د وژل شویو امریکایي سرتیرو د بېساري زړورتیا او سرښیندنې وستایلې.
هغه وویل د نن شپې مراسم د هغو سرتېرو زړورتیا او قربانۍ ته ځانګړې شوې دي چې له خپلې دندې هم هاخوا یې سرښیندنې کړی دي، هغه قربانۍ چې د چارواکو په وینا یې د خلکو ژوند ژغورلي او د متحده ایالاتو د پوځ تر ټولو غوره ارزښتونه انځوروي.
د سپینې ماڼۍ په مراسمو کی چی یو شمیر سرتیري او د امریکا د جنګ وزیر پیت هیګسټ او د وسلوالو ځواکونو لوی درستیز ډان کېن په ګډون امریکایي جګپوړي چارواکي حاضر و وویل:"نن موږ د هغو څلورو اتلو امریکایي سرتېرو په ویر کې یو چې د دندې پر مهال ووژل شول. موږ د هغوی له کورنیو سره د دوی د غم په دې سخت وخت کې خپله مینه غم شریکي او ملاتړ څرګندوو.
د لبنان حکومت د دوشنبې په ورځ (د مارچ دویمه) د حزب الله ټول پوځي فعالیتونه بند کړل. بیروت دا کار له هغې وروسته وکړ چې په ایران باندې د متحدو ایالتونو او اسرائیل د ګډو بریدونو له پیل سره، د تهران تر حمایت لاندې د حزب الله ترهګرې ډلې په اسرائیل توغندي او بې پیلوټه الوتکې وتوغولې.
اسرائیل د حزب الله د بریدونو په ځواب کې د لبنان په سوېلي برخو او بیروت کې هوایي بریدونه وکړل.
کویټ، سعودي عربستان، بحرین، قطر، اردن، متحده عربي اماراتو او متحدو ایالتونو په یوې ګډې اعلامیې کې د سیمې په هېوادونو باندې د ایران بریدونه په کلکه غندلي دي.
په اعلامیې کې ویل شوي: «دا ناموجه بریدونه په مستقلو قلمروونو شوي، د ملکیانو ژوند یې له خطر سره مخامخ کړی او ملکي تاسیسات یې زیانمن کړي» دي.
اعلامیه وايي چې د ایران «بې باکه چلند» سیمه کمزورې کوي. دغو هېوادونو ویلي: «موږ د خپلو اتباعو، حاکمیت او قلمرو څخه په دفاع کې متحد یو او د دغو بریدونو په وړاندې د خپل ځان څخه د دفاع په حق باندې تاکید کوو.»
د امریکا د متحدو ایالتونو د جنګ وزیر پېټ هیګسټ وویل چې ایران «د قوي توغندیو او بېپیلوټه الوتکو په جوړولو بوخت و، څو د خپلو اټومي باج اخیستونکو هیلو لپاره یو دودیز پوځي ډال جوړ کړي.»
هیګسټ د دوشنبې په ورځ د مارچ دویمه په پنټاګون کې په داسې حال کې خبرې کولې چې د امریکا د وسلوالو ځواکونو لوی درستیز جنرال ډان کېن یې ترڅنګ ولاړ و.
هیګسټ وویل «هغوی داسې یو دودیز ټوپک زموږ پر سر نیولی و، په داسې حال کې چې د اټومي بم د ترلاسه کولو لپاره یې د درواغو له لارې هڅه کوله.»
هغه وویل چې دوی دا کار «زموږ د خلکو په وینو، په بیروت کې د موټربمونو چاودنو، زموږ پر بېړیو د راکټي بریدونو، زموږ په سفارتونو کې وژنو، او په عراق او افغانستان کې د سړک غاړې په بمونو» تر سره کړی دی.
