د لاس رسي وړ اتصالات

په افغانستان کې د ټول شموله حکومت په جوړېدو د ایران ټينګار


د ایران د بهرنیو چارو وزارت ویاند سعید خطیب زاده

د ایران د بهرنیو چارو وزارت یو ځل بیا په افغانستان کې له ټولو قومونو څخه تشکیل شوي همه شمول حکومت په جوړېدو ټینګار کړی او ویلي دي چې دا د ایران او د افغانستان د ګاونډیو هیوادونو غوښتنه ده.

د ایران د بهرنیو چارو وزارت ویاند سعید خطیب زاده د دوشنبې په ورځ جنورۍ درېیمه (مرغومې ۱۳) خبریالانو ته ویلي: "هغه څه چې په افغانستان کې دې له ټولو څخه لومړی د ایران او ګاوندیو هیوادونو د ټینګار وړ دي، د یو ټول شموله حکومت تشکل دی چې د افغانستان د ټولو خلکو او قومونو منعکس کوونکی وي... د افغانستان د راتلونکي مسیر، د خلکو د ارادې تحقق دی او د دې ټولو سره، خو هغه څه چې موږ یې انتظار لرو دغه دي چې دغه څه تحقق پیدا کړي."

خطیب زاده زیاته کړې چې ایران د طالبانو په ګډون په افغانستان کې له ټولو لورو سره په اړیکه کې دی او د دغه هیواد استازو کابل ته په خپل وروستي سفر کې د تهران غوښتنې له طالب استازو سره شریکې کړي دي.

د ایران د بهرنیو چارو وزارت ویاند ویل چې هیوادونه تر اوسه چمتو نه دي چې د طالبانو حکومت په رسمیت وپېژني: "موږ اساساً د [رسمیت] پېژندلو په ځای کې قرار نلرو او هیله مند یو چې په افغانستان کې حاکم سرپرست هیات په داسې یو لوري حرکت وکړي چې د خلکو د غوښتنې او ارادې په نظر کې نیولو سره د خپلو اقداماتو له لارې نړیواله پېژندنه تر لاسه کړي."

د اګست په پنځلسمه په افغانستان د طالبانو تر حاکمیت وروسته تر دا مهاله د دوی حکومت د هیڅ هېواد لخوا په رسمیت نه دی پيژندل شوی.

د طالبانو د سرپرستې کابینې له اعلان وروسته چې له نیمایي زیات غړي یې د ملګرو ملتونو د امنیت شورا د بندیزونو په لست کې شامل دي، یو شمېر هېوادونو یې په احتیاط سره هرکلی کړی او یو شمېر نورو هېوادونو او نړیوالو بنسټونو پرې نیوکه کړې ده.

د طالبانو ۳۳ کسیزه سرپرسته کابینه چې ټولې څیرې یې د طالبانو غړي او یا ورپورې تړلي کسان دي او په ټوله شموله حکومت باندې د نړیوال ټینګار برعکس له طالبانو پرته بله څیره، اقلیتونه او یا ښځې د دوی په کابینه کې نه لیدل کېږي.

نړیوالې ټولنې ویلي تر څو چې طالبان یو ټول شموله حکومت جوړ نکړي، ښځو او اقلیتونو ته پکې ځای ورنکړي، او د ښځو او نجونو په ګډون د ټولو افغانانو حقوقو ته احترام ونکړي، تر هغو به یې په رسمیت ونه پيژني.

تر دې مخکې طالب چارواکو ویلي و چې د حکومت سرپرست کابینه یې ټول شموله ده او په هغه کې د افغانستان ټول قومونه شامل دي، هغوی تل دا ډول غوښتنې د افغانستان په کورنیو چارو کې مداخله بللې او ټینګار یې کړی چې هیڅ چاته به د دغه هېواد په داخلي چارو کې د مداخلې اجازه ورنکړي.

په دې وروستیو کې طالبانو ټينګار کړی چې هغوی غواړي له نړیوالې ټولنې سره د اسلامي اصولو په چوکاټ کې ښه او ټینګ روابط ولري.

هغوی همدارنګه د افغانستان له ګاونډیو هیوادونو او په ځانګړي ډول د سیمې له هیوادونو څخه غوښتي چې د ښو اړیکو په رامنځته کولو سره د هغوی سره مثبت رول ولوبوي تر څو د طالبانو په باور، په نړۍ او سیمه کې ښه ګامونه واخیستل شي او موجوده ستونزې او بې باورۍ له منځه لاړې شي.

XS
SM
MD
LG