په ملګرو ملتونو کې د ۲۰۲۱ کال لپاره د افغان ځوانانو استازی وټاکل شو.
احمد فواد شهریار له خپلو دوو نورو سیالانو روسیتا سکندري او احمد فیصل عمران نه د دغې سیالۍ وروستی پړاو وګټه.
په هغې غونډې کې چې د (APT) بنسټ له خوا نن دوشنبه جولای ۱۹ (چنګاښ۲۸) په کابل کې وشوه، درې ورستیو نوماندانو تر ډېره د سولې په روانې پروسې کې د ځوانانو د ونډې په اړه خپل نظرونه وړاندې کړل.
ګټونکي نوماند احمد فواد شهریار په خپلې وینا کې وویل "د جګړې ختمولو لپاره د وسله والو طالبانو تر ټوله لویه غوښتنه د بهرنیو ځواکونو وتل وو، خو اوس ګورو چې د یادو ځواکونو وتلو سره بیا هم د افغانستان برخلیک ناڅرګند دی او دغه چاره افغان ځوانان په مستقیم ډول اغیزمنوي."
ښاغلی شهریار وايي چې د جمهوري نظام ساتل روانو ستونزو ته لویه حل لاره ده.
- احمد فوارد شهریار څوک دی؟
فواد په کابل کې د یو خصوصي پوهنتون څخه په اقتصاد کې د لیسانس درجې سند ترلاسه کړی دی.
هغه په یوې خصوصي راډیو کې د خبریال په صفت هم کار کوي.
فواد وايي هیله لري چې په ملګرو ملتونو کې د افغان ځوانانو ښه استازیتوب وکړي.
دا څلورم کال دی چې د (APT) بنسټ د جرمني هېواد په مالي مرسته هر کال یو افغان ځوان ټاکي او ملګرو ملتونو کې د ځوانانو په استازیتوب غږیږي.
تېر کال ښکلا ځدراڼ د افغان ځوانانو استازولۍ لپاره ټاکل شوې وه.
