د لاس رسي وړ اتصالات

د افغانستان د کرکټ د ۱۹ کلنو لوبډلې بل حیرانوونکی بری


افغانستان د سه شنبې په ورځ له سعودي او د پنجشنبې په ورځ له مالیزیا سره لوبې لري، که یې وګټلې د روانو سیالیو اتل کیږي.

دا د اسیا د کرکټ د شورا د ۱۹ کلنو لوبډلو په غوره لیګ سیالیو کې د افغانستان، درېیم پرلپسې بری دی.

دا لوبه د دوشنبې په ورځ د مالیزیا په کولالمپور ښار کې وشوه.

متحده عربي اماراتو پچه وګټله او منډو جوړولو ته یې ملا وتړله خو ځوانو افغان توپ اچوونکو ته ډېر ونه درېدل. د اماراتو د کرکټ د ۱۹ کلنو ټوله لوبډله په ۳۲ اورونو کې وسوځېدله او افغانستان ته یې د ۸۹ منډو هدف وټاکه.

د اماراتو درې لوبغاړي په صفر، یو یې په یوه او دوه نور یې په دوو- دوو منډو وسوځول شول.د اماراتو په لوبډلې کې تر ټولو ډېرې منډې پرېرا وکړې چې ۳۴ وې.

د افغانستان د کرکټ د ۱۹ کلنو ځوانانو لوبډلې، دغه هدف په ۱۳ اورې کې په ډېرې اسانۍ او د کوم لوبغاړي له سوځېدو پرته پوره او لوبه یې وګټله.

په افغان توپ اچونکو کې طارق پنځه، ضیاالرحمن او رشید خان دوه- دوه او محمد ظاهر د اماراتو یو لوبغاړي وسوځول.

د افغانستان د لوبډلې د سر دواړه منډه جوړونکو لوبغاړو حضرت الله ځاځي او ناصر خان ۴۱ – ۴۱ منډې وکړي.

د دغې لوبې غوره لوبغاړی طارق خان شو، چې د اماراتو پنځه لوبغاړي یې وسوځول.

د افغانستان د کرکټ د ۱۹ کلنو لوبډلې په دغو روانو سیالیو کې نیپال او کویټ ته هم ماتې ورکړي دي.

افغانستان د سه شنبې په ورځ له سعودي او د پنجشنبې په ورځ له مالیزیا سره لوبې لري، که یې دا دواړه هم وګټلې نو د اسیا د کرکټ د شورا د ۱۹ کلنو لوبډلو د پریمیرلیګ سیالیو اتل کیږي.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG