د اسوشیتید پرس اژانس د رپوټ له مخې پاکستان هغه پلان شوې لوبه لغوه کړه چې ټاکل شوي وو د اپریل په میاشت کې د افغانستان او پاکستان د کرکټ د ملي لوبډلو ترمنځ وشي.
پاکستان دا تصمیم د لاهور په ښار کې د تیرې یکشنبې د ورځې د ځانمرگي بمي برید د عواقبو په نتیجه کې د امنیتي دلیلونو په وجه نیولی دی. د تیرې یکشنبې په ورځ په لاهور کې په یو ځانمرگي برید کې ٧٠ تنه ووژل شول.
د پاکستان د کرکټ بورډ ویاند نن پنجشنبې د اسوشیتید پرس اژانس ته وویل چې په دې هکله یې د افغانستان د کرکټ بورډ سره خبرې کړې وې، خو "اوس دغه سفر په هیواد کې د عمومي امنیتي وضیعت په خاطر لغوه شو."
د پاکستان د کرکټ بورډ پلان درلود چې په لاهور او کراچۍ کې د افغانستان د کرکټ ټیم په وړاندې درې یوه ورځنۍ لوبې وکړي. ټاکل شوی وه چې دا لوبې په لاهور او کراچۍ کې وشي چې یوه یې هم د پاکستان د A ټیم سره وه.
د افغانستان د کرکټ د ملي ټیم اجرائیوي دایرکتر عزیزالله فضلي ویلي چې د پاکستان نه یې په دې سفر کې د افغان لوبډلې د امنیت د ضمانت غوښتنه کړې وه. هغه د پاکستان د کرکټ بورډ ځواب د " نه منلو" وړ بللی دی.
ښاغلی فضلي وایي چې "مونږ پاکستان ته بل وړاندیز وکړ چې دا لوبه دې په دوبۍ کې وشي، دا به ښه وي ځکه د دواړو هیوادونو زیات شمیر وگړي هلته ژوند کوي:" خو د هغه په وینا تر اوسه یې ځواب نه دی ترلاسه کړی.
د ٢٠٠٩ کال راهیسې چې په لاهور کې د سریلانکا د کرکټ د ټیم پر بس موټر باندې برید شوی و د هغه وخت راهیسې تر اوسه په پاکستان کې د هیڅ بهرني ټیم سره عمده ټیست لوبه نه ده شوی، یواځې تیر کال زمبابوی په لاهور کې یوه ورځنۍ لنډه لوبه ترسره کړه.