د لاس رسي وړ اتصالات

افغان حکومت وايي پر فیسبوک یې محدودیت نه دی لګولی


د افغانستان د خبریالانو ملي ټولنه وايي په ځینو سیمو کې فیسبوک په اسانۍ سره نه پرانیستل کیږي

د افغانستان د مخابراتو او تکنالوژۍ او اطلاعاتو او فرهنګ وزارتونو هغه ادعاوې رد کړې چې ګنې په ځینو سیمو کې د فیسبوک ټولنیزې رسنۍ ته لاسرسی ستونزمن شوی او یا شاید محدودیت پرې لګول شوی وي.

د افغانستان د خبریالانو ټولنې او د خبریالانو د ملاتړ ادارې نۍ ادعا کړې وه چې د "فیسبوک" ځینې کاروونکي او فعالان شکایت لري چې د قوي او چټک انټرنټ سره سره بیا هم په اسانۍ سره یې د فیسبوک پاڼې نشي پرانیستلی.

د خبریالانو د ټولنې په اعلامیې کې راغلي "د افغانستان د خبریالانو ملي اتحادیه فیسبوک ته د لاسرسي په برخه کې موجوده ستونزه تایدوي او د مخابراتو له وزارت نه غواړي چې په دې اړه جدي پلټنه وکړي".

خو د افغانستان د مخابرات وزارت ویاند محمد یاسین صمیم امریکا غږ اشنا ته وویل "موږ د افغانستان د خبریالانو د ټولنې او نۍ دا ادعا په کلکه ردو او د هغوی ادعاوې بې اساسه دي. هېڅ اړتیا نشته چې پر ټولنیزو رسنیو باندې دې دا ډول کوم محدودیتونه ولګول شي".

ښاغلي صمیم وویل که په ټولنیزو رسنیو باندې د محدودیت او یا د هغوی بندولو ضرورت پيدا شي، د ولسمشر په ګډون نور لوړ پوړي چارواکي به یې په اړه پرېکړه کوي او دا یوازې د مخابراتو او ټکنالوژۍ د وزارت کار نه دی.

د افغانستان د مخابراتو وزارت وايي د خبریالانو ټولنې تر دې دمه د خپلې دغې ادعا په اړه کوم ثبوت نه دی وړاندې کړی.

په همدې حال کې د افغانستان د اطلاعاتو او کلتور وزارت هم وايي چې دوی په دې اړه کوم تصمیم نه دی نیولی دی.

د وزارت ویاند هارون حکیمي امریکا غږ اشنا ته وویل "د اطلاعاتو او فرهنګ وزارت له اړخه په دې هکله نه کوم تصمیم نیول شوی او نه د ټولنیزو رسنیو د سانسور په برخه کي کوم بل حکومتي ارګان ته کومه سپارښتنه شوېده. که چیري په دې برخه کي چا کومه ستونزه احساس کړې وي، کېدای شي تخنیکي ستونزه ولري".

د شمېرو له مخې په افغانستان کې شاوخوا پنځه میلیونه خلک ټولنیزې رسنۍ کاروي، چې اکثریت یې د فیسبوک فعالان دي.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG