د افغانستان د نولس کلنو لوبډلې د نړیوال جام په سیالیو کې دریمه او وروستۍ لوبه په آیرلینډ وبایلله او پخپل ګروپ کې په دویم مقام راغی. افغانستان پخپل ګروپ کې لومړنۍ لوبه د پاکستان او دویمه د سریلانکا د لوبډلو نه وګټله خو په دریمه لوبه کې یې ونشو کړی چې د آیرلینډ نسبتاً کم هدف ور پوره کړي.
آیرلینډ د افغانستان لوبډلې ته د ۲۲۵ رنزونو هدف ورکړی و خو افغان لوبډلې وکړی شو ۲۲۱ رنزونه وکړي او لوبه یوازې د څلورو رنزونو په توپیر وبایلي.
د نړیوال جام په دویم پړاو یا کوارټر فاینل کې اته لوبډلې دي. هره لوبډله پدې پړاو کې یوه یوه لوبه کوي چې په ګټلو سره یې نیمه پای لوبې یا سیمي فاینل ته ځي او که یې وبایلي، د سیالیو نه اوځي.
افغانستان په دویم پړاو کې د نیوزلینډ د لوبډلې سره د پنجشنبې په ورځ مخامخ کیږي. نیوزلینډ پخپل ګروپ کې خپلې درې واړه لوبې ګټلي دي خو افغانستان بیا یوه لوبه بایللې ده.
