د لاس رسي وړ اتصالات

دفاع وزارت: د نیمروز هوايي برید کې پاکستانیان وژل شوي


دفاع وزارت وایي د عامو وګړو د مرګ ژوبلې د ادعاو په اړه څېړنې روانې دي

د افغانستان دفاع وزارت وايي، دوې شپې مخکې د نیمروز ولایت په خاشرود ولسوالۍ کې د هوايي برید پر مهال د ۹ پاکستانیانو په ګډون ۱۴ وسله وال وژل شوي دي.

دفاع وزارت نن دوشنبه جنورۍ ۱۱( مرغومې ۲۲) ویلي چې هوايي ځواکونو دغه برید دوه شپې مخکې د خاشرود ولسوالۍ په «منظري» سیمه کې د طالبانو پر قرارګاه کړی دی.

د دفاع وزارت په اعلامیه کې راغلي: "په دغه هوايي برید کې ۹ پاکستاني ترهګر او ۵ تنه د سیمې طالبان ووژل شول او شپږ تنه نور ټپیان شول."

د افغانستان دفاع وزارت همدارنګه زیاته کړې چې په دې برید کې عامو وګړو ته د مرګ ژوبلې د ادعاو په تړاو څېړنې روانې دي.

تیره ورځ د نیمروز د ولایتي شورا مشر باز محمد ناصر وویل په یاد ولایت کې د افغان ځواکونو په هوايي برید کې ۱۳ ملکي وګړي وژل شوي او دوه نور ټپیان شوي دي.

هغه زیاته کړې وه چې یاد هوايي برید د افغان قواوو له خوا د وسله والو طالبانو پر یوې غونډې شوی چې د هستوګنې یو کور ته نژدې جوړه شوې وه.

تیره ورځ د سیمې اوسېدونکو د وژل شوو کسانو مړي د اعتراض په ډول د نیمروز مرکز زرنج ته انتقال کړي وو.

خو د نیمروز والي زمریالي احدي هم تیره ورځ په یوې اعلامیې کې وویل چې دغه هوايي برید په سیمه کې د طالبانو پر یو مرکز شوی چې په وینا یې د دغه ډلې د سرې قطعې ۱۲ جنګیالي پکې وژل شوي او دوه نور ټپیان شوي دي.

هغه ویلي و چې ملکي وګړو ته د اوښتې مرګ ژوبلې د ادعاو د څېړلو لپاره سیمې ته یو پلاوی استول شوی دی.

وسله والو طالبانو تر دا مهاله په دې اړه څه نه دي ویلي.

XS
SM
MD
LG