د افغانستان د کرنې او مالدارۍ وزارت مسؤلین وايي، روان کال په دغه هیواد کې څه باندې ۱۹ ټنه زعفران تولید شوي دي.
د دغه وزارت د معلوماتو لهمخې سږکال د افغانستان په بېلابېلو ولایتونو کې پر ۷زره ۵۵۷جریبه ځمکه باندې د زعفرانو کښتونه شوي و چې نسبت تېر کال ته یې په تولید کې ۲۲ سلنه زیاتوالی هم راغلی دی.
تېر کال پر ۶زره ۲۷۲جریمه ځمکه باندې د زعفرانو کښتونه شوي و، چې د کرنې وزارت د معلوماتو په اساس ۱۶ ټنه زعفران ورڅخه تر لاسه شوي و.
د کرنې وزارت ویاند اکبر رستمي د چهارشنبې په ورځ د «مرغومې پر۴مه» امریکا غږ ته وویل، چې روان کال تر ټولو زیات زعفران په هرات، کندهار، دایکنډي، بلخ، سرپل او ارزګان ولایت کې تولید شوي دي.
ښاغلی رستمي د زعفرانو د تولید زیاتوالي لاملونه د زعفرانو د کښتونو زیاتېدل، د کرنې وزارت لخوا کروندګرو ته روزنه ورکول او هغوی ته د ښه کیفت لرونکو پیازو وېش او د یو شمېر نورو پروګرامونو تر سره کېدل یاد کړل.
د کرنې او مالدارۍ وزارت د معلوماتو په اساس په کابل، غزني، هرات او فریاب کې د زعفرانو د پروسس څلور مرکزونه جوړ شوي چې پکې دوه زره نارینه او ښځینه زعفران کاران هم پکې روزل شوي دي.
روانه اونۍ د افغانستان د زعفران کارانو ملي ټولنې خبر ورکړ چې سږکال د افغانستان زعفران په نړیواله کچه د ښه کیفیت لهمخې د اتم ځل لپاره په لومړي مقام کې راغلي دي.
د دغه ټولنې مرستیال قدرت الله رحمتي تېره شنبه امریکا غږ ته وویل، چې په بلجیم کې د «ITQi» په نوم انسټیټیوټ د ښه کیفیت لهمخې افغان زعفرانو ته دغه لومړی مقام ورکړئ دی.
د کرنې وزارت چارواکي همدارنګه زیاتوي، چې روان کال افغان زعفرانو له خپل کار او بار څخه ۲۷ میلیونه امریکايي ډالر تر لاسه کړي دی.
دغه وزارت وايي، اوس مهال د افغانستان په بازارونو کې د زعفرانو یو کیلو په ۹۰زره افغانۍ او په نړیوالو بازارونو کې تر ۱۴۰۰ ډالرو پورې پلورل کېږي.
د افغانستان زعفران چې د کیفیت لهمخې په نړیوالو بازارونو کې خاص ځای لري تر دامهاله چین، امریکا او یو شمېر نورو اروپايي بازارونو ته صادر شوي دي.