په پاکستان کې امنیتي تدابیر وروسته تر هغه ډیر شول چې پنجشنبه مارچ ۳۰ (کب۱۰) د وړیا اوړو د ویش پر مهال په ټیل ماټیل کې لږ تر لږه ۱۱ تنه ووژل شول.
چارواکو ویلي چې اته تنه په خیبرپښتونخوا او ۳ نور د پنجاب په ولایت کې وژل شوي.
پاکستان چې د نغدو پیسو د جدي کمښت سره مخ دی، تیره اوونۍ یې د روژې په میاشت کې د بې وزلو کورنیو سره د وړیا اوړو ویش پداسې حال کې پیل کړ چې د شیانو بیعې دورمره لوړې شوې چې د دې هیواد په تاریخ کې ساری نلري.
حکومت غواړي پدې کار سره د لږ عاید لرونکو کورنیو د اوږو بار سپک کړي خو د وړیا اوړو د ویش په مرکزونو کې له یوې خوا د خلکو ګڼه ګوڼه ډیره وي او له بلې خوا د خلکو سره دا ویره وي چې د حکومت ددې مرستو تر لاسه کولو لپاره به یې نوبت ونه رسیږي او له همدې کبله ټیل ماټیل کیږي.
د پاکستان د پنجاب ولایت سرپرست حکومت ویلي چې تر اوسه یې پدې ولایت کې په خلکو شل ملیونه خلطې وړیا اوړه ویشل شویدي.
په عین حال کې د خیبر پښتونخوا په ولایت کې چارواکي وایي چې د خلکو لپاره په کافي اندازه اوړه لري خو دا چې خلک حوصله نکوي له همدې کبله ټیل ماټیل شوی.
د پاکستان د صدراعظم شهباز شریف حکومت داسې مهال په هیواد کې د وړیا اوړو ویش پیل کړی چې لا یې هم د پیسو د نړیوال وجهي صندوق څخه ۱.۱ ملیارد ډالر اقتصادي مرستې ندي تر لاسه کړي او د داسې اقتصادي بحران سره مخ دی چې د دې هیواد په تاریخ کې ساری نلري.
د خپل تاریخ تر ټولو ناوړه اقتصادي وضعیت تر څنګ، د پاکستان د بهرنیو شتمنیو ذخیره هم مخ په کمیدو ده او انفلاسیون هم په بې سارې توګه ۴۵ سلنې ته رسیدلی.
د خوراکي موادو د نرخونو لوړوالي او د ګاز او برښنا په بیلونو کې ډیروالي په ټول پاکستان کې خلک اندیښمن کړي. اقتصادي کارپوهان چې په پاکستان کې اقتصادي چارې څاري وایي دا هیواد د آی ایم ایف لخوا د اقتصادي مرستو تر لاسه کولو کې د ځنډ له کبله د داسې یو حالت سره مخ دی چې نشي کولی خپل په ټاکلې مودې ادا کړي.
دغه کارپوهان وایي چې په تیر یو کال کې د سبزیجاتو، میوو، غلې دانو، لبنیاتو او برښنا نرخونه دوه چنده لوړ شوي او بزګران هم نشي کولی چې د خپلو کښتونو لپاره کیمیاوې سرې په ټیټ نرخ پیدا کړي.
