د امریکا په ویرجینیا ایالت کې د مسلمانانو یوه ټولنه د روژې په میاشت کې خواړه پخوي او ددغه ایالت او شاوخوا سیمو پر بې کوره خلکو یې ویشي.
د خوړو وېشلو دې چارې ته "د فکري خوړو" نوم ورکړل شوی چې د "امین پروژې" په نوم غیر انتفاعي موسسې له خوا پر مخ وړل کیږي. دا موسسه په ۲۰۱۸ کال کې د ویرجینیا ایالت د مسلمانو سوداګرو له خوا رامنځته شوې ده.
بنګله دیشي الاصله امریکایي سید مظهر د "فکري خوړو" پروګرام رضاکار چې واشنګټن ته نږدې ژوند کوي، د یکشنبې په سهار، له لمانځه وروسته، خواړه پخوي. وايي، په خوړو کې یې کوفته، نخود او سبزیجات شامل دي. دا خواړه د کورنۍ یا ملګرو لپاره نه دي، مګر د واشنګټن د سیمې د بې کوره خلکو لپاره دي.
سید مظهر وايي: "کله چې مونږ خواړه پخوو، نو مونږ یې په تصادفي ډول نه پخوو. مونږ ګورو چې د دوی لپاره څه ښه دي."
د مظهر لپاره، د خواړو شریکول د هغه د عقیدې ښکارندویي ده. وايي: "دا د دې استازولي کوي چې موږ مسلمانان څوک یو."
د "امین پروژه" له یوه اپلیکیشن نه پیل شوې چې د مسلمانانو اړوند د جوماتونو، د لمونځ د وختونو، جنازې او داسې نورو ټولنیزو غونډو په اړه معلومات خپروي.
د "فکري خوړو خیریه ټولنې" یوه غړې، نایلا سنګکار، وايي چې ماشومان یې په "امین" پروژه کې د رضاکارانو په توګه فعال دي. هغه وايي: "زه هیله لرم چې دوی دا احساس کړي او له خدایه منندوی واوسي چې هر هغه څه لري چې دوی ورته اړتیا لري."
د واشنګټن ډي سي په شاوخوا مختلفو پارکونو کې په سلو بې کوره خلکو خواړه او څښاک ویشل شوي دي.
د فکري خوړو خیریه ټولنې غړی، عبدالرزاق محمد، یې په هکله وايي: "مونږ خلکو ته پرته له دې چې پوه شو چې څوک دي، عیسوي، یهودي، که هرڅوک خو چې بې کوره وي، څوک نه لري چې د دوی ساتنه وکړي، مونږ ورته خواړه وېشو."
وروستي رسمي ارقام ښیي چې په واشنګټن ډي سي کې شاوخوا ۴۴۰۰ تنه بې کوره خلک شتون لري، چې د کرونا وبا د وخت په پرتله کم دي، مګر ډیری یې لاهم منظمو خوراکي مرستو ته اړتیا لري.
