د لاس رسي وړ اتصالات

بګرام پوځي اډې ته نژدې پر بهرنیو ځواکونو ځانمرګی برید شوی


د پروان چارواکي وايي، ځانمرګی پلی و

د پروان سیمه ییز چارواکي وايي، تېره شپه بګرام پوځي اډې ته نژدې د بهرنیو ځواکونو پر موټریز کاروان ځانمرګی برید شوی دی.

د چارواکو په وینا دغه پېښه تېره شپه ۱۱ بجې د بګرام ولسوالۍ په صیاد سیمه کې رامنځته شوې ده.

د پروان د همغږۍ د عمومي مرکز قوماندان الوزي احمدي نن شنبه د «وږې میاشتې پر۲مه» امریکا غږ ته وویل، ځانمرګی پلی و او د بهرنیو ځواکونو د موټریز کاروان په منځ کې پر ځان پوري تړلو موادو ته چاودنه ورکړې ده.

هغه وویل، په دغه پېښه کې بهرنیو ځواکونو ته د اوښتو تلفاتو په اړه معلومات نه لري. خو زیاته یې کړه چې دوه ملکي وګړي پکې ټپیان شوي چې وضعیت یې ښه دی.

نوموړي زیاته کړه چې د یاد برید پرمهال د صیاد ولسوالۍ د بازار دوه دوکانونه سوځېدلي او نورو دوکانونو ته یې زیان رسېدلی دی.

طالبانو بیا د یاد برید د مسؤلیت په اخیستلو سره، په دغه ځانمرګي برید کې د او بهرنیو ځواکونو د وژلو او څلورو نورو د ټپې کېدو ادعا کړې ده.

که څه هم ناټو تر دا مهاله په دې اړه څه نه دي ویلي، خو یو بل امریکايي چارواکي بهرنیو ځواکونو ته د مرګ ژوبلې اړولو په اړه د طالبانو ادعا رد کړې ده.

دا په داسې حال کې ده چې د تېرې چهارشنبې په ورځ په افغانستان کې د قاطع ملاتړ ماموریت په دغه هېواد کې دوو امریکايي سرتېرو د وژل کېدو خبر ورکړ.

طالبان پر داسې مهال پر بهرنیو ځواکونو ځانمرګی برید کوي چې په دوحه کې له امریکايي استازو سره په نهم پړاو مذاکراتو بوخت دي.

XS
SM
MD
LG