د لاس رسي وړ اتصالات

د مسلمانو پناه غوښتونکو په اړه د جرمني یهودانو نظر


په جرمني کې یهود فعالین وایي چې په دې هیواد کې د یهودي ضد چلند ریښه د ۱۹۳۰ کلونو او د نازي دیکتاتورۍ سره اړیکه لري.
په جرمني کې یهود فعالین وایي چې په دې هیواد کې د یهودي ضد چلند ریښه د ۱۹۳۰ کلونو او د نازي دیکتاتورۍ سره اړیکه لري.

کله چې د جرمني د یهودانو مشر جوزف شوستر اروپا ته د پناه غوښتونکو د بهیر پر ضد څرگندونې وکړې، یو خاخام (یهودي روحاني) زده کوونکي د یو مطلب په لیکلو سره د هغه نظر نژادي توپیر وگاڼه او هغه یې محکوم کړ.

دا کار د جرمني د یهودانو ترمنځ د مناظرې سبب شو چې آیا هغوی د مهاجرینو د اټکل نه کیدونکي سیلاب په وجه چې په عمده توگه د اسرائیل د مخالفو هیوادونو خلک په کې شامل دي، اندیښمن اوسي او که نه.

دغه یهودي روحاني زده کوونکی ارمین لانگر، د خپل اعتراض په وجه د پوستدام د ابراهام گیگر له کالج څخه وایستل شو. لانگر د یوې عقیدتی ډلې " سلام – شلوم" بنسټ ایښونکی دی چې د مسلمانانو او یهودانو ترمنځ د مفاهمې او دیالوگ غښتلتیا ته ژمننه ده. هغه د اسوشیتدپرس اژانس ته وویل چې ټولنه باید د لږکیو په وړاندې توپیري نظر ونه لري.

خپلې جذبه لرونکې لیکنې ته په اشارې ښاغلي لانگر ویلي دي چې ددې لیکنې د ژبې په وجه چې د جرمني په تاگیز سایتونگ ورځپاڼې کې خپره شوې اوس پښیمانه دی، خو هغه د کالج چلند چې گویا دده "شخصي نظریات" یې کوبلي دي "ناسم کار" وباله.

ارمین لانگر د څو میاشتو لپاره یو مسلمان مصري پناه غوښتونکي ته په خپل کور کې ځای ورکړی و
ارمین لانگر د څو میاشتو لپاره یو مسلمان مصري پناه غوښتونکي ته په خپل کور کې ځای ورکړی و

د المان د یهودانو ۲۵۰ زره کسیزه ټولنه پر لانگ باندې د هغه د څرگندونو په وجه په غوسه ده. د جرمني زیات شمیر یهودان د شوستر د نظر سره موافق دي چې گویا د نویو پناه غوښتونکو په راتلو سره په دې هیواد کې یهودي ضد احساسات یو ځل بیا زیات شوي دي. د جرمني د یهودانو مشر شوستر، حتی ددې هیواد یهودي ټولنې ته خبرداری ورکړی و چې په گڼ میشته مسلمانو ساحو کې د یهودانو د ځانگړې خولۍ له اغوستلو څخه ډډه وکړي.

د ابراهم گیگر د کالج رئیس والتر هومولکا، د اسوشیتیدپرس اژانس ته وویل چې د لانگرلیکنه د جرمني پر یهودانو باندې د پراخ تعرض سبب شوه. ښاغلي هومولکا وویل چې دغه یهودي دیني زده کوونکي همداشان په دې کالج کې د داخلیدو له تړون نه سرغړونه کړې چې له مخې یې زده کوونکي نه ښایي چې "په رسنیو کې بې ځایه څرگندونې" وکړي. هغه زیاته کړه چې لانگر د یو کال لپاره له کالج څخه ایستل شوی دی.

خو لانگر، دغه هنگري الاصله یهود ویلي دي چې د ماسترۍ زده کړو ته به د "یهودي الهیاتو" په برخه کې د پوستدام په پوهنتون کې دوام ورکړي او خپلې خاخامي زده کړې به په بل کوم ځای کې پرمخ بوزي.

د جرمني د یهودانو مشر جوزف شوستر په دې هیواد کې د یهدوانو ضد احساساتو په اړه خبرداری ورکړی دی
د جرمني د یهودانو مشر جوزف شوستر په دې هیواد کې د یهدوانو ضد احساساتو په اړه خبرداری ورکړی دی

په دې ترڅ کې په جرمني کې یو شمیر یهودي فعالان لکه جرمني الاصله اسرائیلي شیکد سپیر چې د نويو راغليو پناه غوښتونکو سره مرسته کوي د نویو راغلیو مهاجرو سره د یهودي ضد احساساتو اړوند کول یو بې ځایه او "پوچ" عمل گڼي. هغه وایي چې یهودستیزی یا ضد یهودي چلند په جرمني کې د ۱۹۳۰ کال راهیسې شتون درلودلی دی، هغه پدیده چې د هغه په وینا د نازیانو له لورې د هلوکاست د رامنځ ته کیدو سبب شوه.

د نویو پناه غوښتونکو څخه اندیښنه د جرمني په یو شمیر یهودي کورنیو کې پوره احساسیږي ، تر هغه چې یو شمیر یې حتی په بهر کې په عبري ژبه له گړیدو څخه ډډه کوي.خو لانگر چې د څو میاشتو لپاره یې یو مسلمان مصري پناه غوښتونکي ته په خپل اپارتمان کې ځای ورکړی و، په دې ډول ویرې او ډار باندې د بریالیتوب لار د یهودانو او مسلمانانو ترمنځ په مستقیمه مفاهمه کې ویني.

لانگر وویل " په واقعیت کې هغه څه چې اوس یې باید د یو مسلمان او یو یهود په توگه وکړو، هغه په جرمني کې د یهودي ضد او مسلمانانو ضد احساساتو پر وړاندې گډه مبارزه ده."

رپوټ: د اسوشیتدپرس اژانس
ژباړه: عارف عثمانزوی

XS
SM
MD
LG