په هند کې په پوځی او استخباراتو څوکیو کې تازه بدلونونو سیاسي ناندرۍ پارولي دي.
هند په خپلو پوځي او استخباراتي برخو کې د بدلونونو په لړ کې د پوځ، هوايي ځواکونو او استخباراتو نوي مشران وټاکل.
دا اقدام د هند د پوځ د دوو لوړپوړیو چارواکو له تقاعد کېدلو یوازې دوه اونۍ مخکې کیږي.
د لوی درستیز مرستیال ډګرجنرال بایپن روات د تقاعد کېدونکي لوی درستیز، جنرال دلبیر سنګ سوهاک، پر ځای ګمارل شوی دی.
د هوايي ځواکونو جنرال او د جنګي الوتکو پیلوټ، بېرند سنګ دهانوا، د هند د هوايي ځواکونو د مشر اروپ راها پر ځای ټاکل شوی دی.
ښاغلی روات د ترهګرۍ د مخنیوي کارپوه دی خو اوس ورته تر ټولو لوړ پوځي مقام ورکړل شوی دی.
ښاغلی روات د هند او پاکستان ترمنځ د کشمیر په لانجمنې کرښې کې د کار کولو تجربه هم لري.
د دغو ټاکنو په لړ کې، انیل دسمانا د هند د بهرني استخباراتو او پلټنو او راجیف جاین د هند د کورنیو استخباراتو د نویو مشرانو په توګه د دوو دوو کلونو لپاره ټاکل شوي دي.
سیاسي ناندرۍ
د رویټرز خبري اژانس د هند د حکومت د یو مخکني وزیر منیش تواري خبره اخیستې ده چې وايي ولې په دندو کې د نویو کسانو په ګمارلو کې کاري تجربه او سابقه په پام کې نه نیول کیږي.
همدغه راز د هند کمونست ګوند هم پر دغې ګمارنې نیوکه کړې ده، خو د هند د واکمن ګوند ( بي جی پي) ویاند وویل چې دا د سیاسي بحث مسئله نه ده.
هغه وویل "حکومت هر څوک چې مناسب وګڼي پر دندې ګماري". هندي مطبوعات وايي چې د ۱۹۸۳ کال راهېسې دا لومړی ځل دی چې د هند د متقاعد کېدونکو لوړ پوړیو پوځي مشرانو پر ځای ډېر تجربه کاره او سابقه کار کسان نه ګمارل کیږي.
