د لاس رسي وړ اتصالات

ایران کې د کرونا ویروس له کبله د مړو شمېر تر ۶۰زرو واوښت 


ایراني چارواکي‌ وايي د جنورۍ تر میاشتې مخکې هره ورځ د کرونا له کبله هلته تر ۱۰۰ زیات کسان مړه کېدل

د ایران د عامې روغتیا وزارت وايي په تېرو ۲۴ ساعتونو کې ۹۳ کسان د کروناویروس له کبله مړه شوي دي.

د ایران د عامې روغتیا د وزارت ویاندې سیما سادات د یکشنبې په ورځ فبروري ۲۸ (کب۱۰) په یو تلویزوني بیان کې وویل: « متاسفانه چې په تېرو ۲۴ ساعتونو کې د کروناویروس له کبله ۹۳ نور کسان هم مړه شول او د دغې وبا له کبله د ټولو مړه شویو کسانو شمېر ۶۰۰۷۳ ته ورسېده.»

د ایران د عامې روغتیا وزارت د شمېرو له مخې په دغه هېواد کې تر دې دمه څه باندې ۱.۶ میلیون کسان د کرونا په ویروس اخته شوي دي. خو چارواکي‌ وايي‌ چې شاید په دغه ویروس د اخته کسانو شمېر تر دې هم زیات وي.

دا په داسې حال کې ده چې د ولسمشر حسن روحاني په ګډون ډېرو چارواکو له خلکو غوښتي دي‌ چې د کروناویروس د خپرېدو او په دغه ویروس د اخته کېدو د مخنیوي لپاره طبي لارښووني په پام کې ونیسي.

ایراني‌چارواکي وايي په دغه هېواد کې د کروناویروس څلورمه څپه خپره شوې ده. د ایران ولسمشر حسن روحاني تېره ورځ د کروناویروس سره د مبارزې د ډلې په اونیزې غونډې کې وویل: «موږ باید څو میاشتې او یا ټول کال د کرونا ویروس له کبله اعلان شوي‌ محدودیتونه وڅارو.»

هغه له ایرانیانو وغوښتل چې د نوي‌ کال په مراسمو کې هم طبي لارښووني په پام کې ونیسي. د مارچ په ۲۱ په ایران کې نوی کال پيلیږي.

د کروناویروس سره د مبارزې د ډلې ویاند علي رضا رئیسي ‌د جمعې په ورځ ‌وویل ایران اندېښنه لري‌ چې د کروناویروس نوې بڼه چې په برتانیا کې خپره شوې،‌ دلته هم ډېره شي. هغه وویل چې ۱۱۲ کسان یې تشخیص کړي‌ دي ‌چې د کروناویروس په دغې بڼې اخته شوي‌دي.

ښاغلي رئیسي‌وویل چې د ویروس دا بڼه په تهران، په جنوبي ایالت خوزستان او ځینو نورو سیمو کې خپره شوې ده.

په ایران کې د کروناویروس له کبله هره ورځ‌ څه باندې ۱۰۰ کسان مړه کېدل چې د چارواکو په وینا له جنورۍ راهېسې دا شمېره تر ۱۰۰ راټېټه شوې ده.

د کروناویروس د ۲۰۱۹ د ډسمبر په میاشت کې د چین په ووهان کې خپور شوی چې دا مهال یې په نړۍ کې څه باندې ۲.۵ میلیون کسان مړه کړي‌ اوڅه باندې ۱۱۳ میلیون نور پرې اخته دي.

XS
SM
MD
LG