د لاس رسي وړ اتصالات

پمپیو ایران د خپل ولس په وړاندې په دوه مخي سیاست تورن کړ


د امریکا د بهرنیو چارو وزیر مایک پمپیو
د امریکا د بهرنیو چارو وزیر مایک پمپیو

د امریکا د بهرنیو چارو وزیر مایک پمپیو د ایران حکومت د خپلو خلکو په وړاندې د دوه گوني سیاست پر مخ بیولو تورن کړی دی.

ښاغلي پمپیو په یو ویدیويي پیغام چې د شنبې په ورځ خپور شوی ویلي د ایران د واکمن رژیم دوه مخی سیاست تر دې حده دی چې د هغو خلکو کورنیو ته چې پخپله حکومت وژلي دي د ویر مراسمو اجازه نه ورکوي، خو د قاسم سلیماني لپاره درې ورځنی عمومي ماتم اعلانوي.

ښاغلي پمپیو همداشان زیاته کړې چې د سپاه پاسداران ایران د قدس ځواک د قوماندان قاسم سلیماني لاسونه د امریکایانو په وینو لړلي دي.

همداشان ښاغلي پمپیو پداسې حال کې چې د جگپوړي ایراني جنرال قاسم سلیماني د له منځه وړلو په هکله یې د ښاغلي ټرمپ پریکړه ستایله پر اروپايي هیوادونو یې نیوکه وکړه چې مرستندوی نه دي.

ښاغلی پمپیو وايي "دومره ویل کفایت کوي او د امریکا ولس باید پوه شي، د ولسمشر ټرمپ لخوا د قاسم سلیماني د له منځه وړلو په پریکړې سره، د ډېرو امریکایانو ژوند وژغورل شو. "

له بلې خوا د شنبې په ورځ (جنورۍ ۴) په عراق کې د ایران د وژل شوي جګپوړي جنرال قاسم سلیماني د ویرمراسم ترسره شول. په دغو مراسمو کې د عراق صدراعظم عادل عبدالمهدي هم ګډون کړی و.

د ایران د سپاه پاسداران د قدس ډلې مشر قاسم سلیماني د جمعې په ورځ د بغداد هوايي ډګر ته څیرمه د امریکا په هوايي برید کې ووژل شول.

د امریکا د بهرنیو چارو وزارت د ۲۰۱۹ کال په اپریل کې په یوه اعلامیه کې ویلي وو چې له ۲۰۰۳ کال راهیسې په عراق کې د ۶۰۳ وژل شویو امریکایانو د وژنې مسولیت د قدس ډلې په غاړه دی او دغه ډله یې د ترهګرو په لست شامله کړه.

پمپیو ایران د خپل ولس په وړاندې په دوه مخي سیاست تورن کړ
please wait

No media source currently available

0:00 0:01:59 0:00

د ایران ولسمشر حسن روحاني د قاسم سلیماني کورنۍ سره په لیدنه کې وویل چې امریکا لویه تیروتنه وکړه. ښاغلی روحاني وايي: "هغوی (امریکا) پوه نه شول چې څه لویه تیروتنه یې وکړه، کومه تیروتنه چې هغوی کړې ده اثر به یې نه یوازې نن، بلکې په راتلونکو کلنو کې وګوري. "

د سلیماني تر وژل کیدو وروسته نړیوال په تمه دي چې آیا ایران به ځواب ورکړي، ځکه مشرانو یې د غچ اخیستو ګواښ کړی دی.

د روانې اونۍ په پیل کې امریکا سیمې ته ۷۵۰ اضافي سرتیري واستول، دفاعي چارواکو امریکا غږ ته ویلي چې نور ۳۰۰۰ سرتیري به هم منځني ختیځ ته ولیږل شي.

XS
SM
MD
LG