د لاس رسي وړ اتصالات

اسرائیل کې د بنیامین نتنیاهو ۱۲ کلنه واکمني نن پای ته رسیږي


بنجامین نیتن یاهو څه باندې ۱۲ کیده چې په اسرائیل کې صدراعظم و.

ټاکل شوې په اسرائیل کې نوی حکومت نن یکشنبه جون ۱۳ (غبرګولي ۲۳) لوړه وکړي او پدې سره به د صدراعظم بنیامین نتنیاهو ۱۲ کلنه واکمني هم پای ومومي.

د نتنیاهو واکمني په اسرائیل کې ساری نلري، خو د سیاسي جنجالونو له وجې په ۲ کالونو کې پدې هیواد کې څلور ځله پکې انتخابات وشول.

ویل کیږي چې د یو واړه سخت دریز ملت پال ګوند مشر نفتالي بینیت به د ښاغلي نتنیاهو پر ځای د اسرائیل صدراعظم وټاکل شي، خو د صدراعظمۍ د مقام د ساتلو لپاره هغه باید د کیڼ او ښي ارخه ګوندونو تر څنک د مرکزي ګوندونو سره پراخ ائتلاف وساتي.

په اسرائیل کې ۸ سیاسي ګوندونه چې کوچنۍ عربي ډلې هم پکې شاملې دي، په نوي واکمن ائتلاف کې دي. دوي ټول د صدراعظم بنیامین نتنیاهو خلاف دي او نوي انتخابات غواړي خو په نورو شیانو کې بیا سره یوه خوله ندي.

دوي ښایي منځلارې اجنډا تعقیب کاندي چې د فلسطین سره د ستونزو کیمدل غواړي او پرته د کوم ستر نوښت کولو، د امریکا د متحده ایالاتو سره هم ښې اړیکې وپالي.‌

خو بلخوا بیا صدراعظم بنیامین نتنیاهو لا هم په پارلمان کې د اسرائیل تر ټولو د ستر ګوند مشري کوي او تمه کیږي چې د نوي حکومت د جوړیدو سره به جدي مخالت څرګند کړي.

که د ښاغلي نتنیاهو پر ضد د جوړي شوي ائتلاف یو ګوند هم د ائتلاف نه ووځي، په پارلمان کې اکثریت د لاسه ورکوي او د له منځه تلو د خطر سره مخ کیږي چې دا کار بنیامین نتنیاهو ته بیا واک ته د رسیدو فرصت په لاس ورکوي.

ټاکل شوې چې د اسرائیل پارلمان په محلي وخت د مازدیګر په ۴ بجو د نوي حکومت په هکله رایه ګیري وکړي. تمه کیږي چې نوی حکومت به د پارلمان د ۱۲۰ څوکیو نه یو څه اکثریت وګټي او وروسته به د حکومت غړي د وفادارۍ لوړه وکړي.

نوي حکومت همدرانګه ویلي چې د وفادارۍ د لوړې نه وروسته همدا نن ماښام خپله لومړنۍ رسمي غونډه هم کوي.

تر اوسه نده معلومه چې آیا نتنیاهو به د نوي حکومت د وفادارۍ د لوړې په مراسمو کې برخه واخلي او که نه. دا هم نده څرګنده چې هغه به څه وخت د صدراعظمۍ د ماڼۍ نه ووځي.

XS
SM
MD
LG