د پاکستان د کرکټ د ملي ټیم کپتان بابر اعظم وايي د هند د کرکټ د وتلي لوبغاړي ویرات کوهلي یې د لوبې د پیل په لومړیو کلونو کې ډیر څه زده کړي دي.
د اسیا جام په لړ کې هند او پاکستان د شنبې په ورځ سپتمر دویمه (وږي ۱۱) په سري لانکا کې مخامخ کیږي.
په کرکټ کې د پاکستان او هند د سختې سیالۍ سره سره، ویرات کوهلي او بابر اعظم څو څو ځله د یو بل ستاینه کړې ده. ۲۸ کلن بابر اعظم د نړیوالو یو ورځنیو لوبو په درجه بندۍ کې لومړی مقام لري.
له هغه وپوښتل شول چې آیا په توپ وهونه کې تر کوهلي تکړه دی، نوموړي وویل: "زه په دې بحث تبصره نشم کولی. راځئ چې دا [مینه والو] ته پریږدو... بايد متقابل احترام ولرو. هغه تر ما مشر دی او زه ورته درناوی کوم. ما له هغه څخه ډېر څه زده کړي دي... ما مخکې هم ویلي چې [د نړیوال] کرکټ په پیل کې مې ورسره خبرې کړي او دې کار له ما سره ډیره مرسته کړې ده."
بابر اعظم ددې خبرو جزیات په ډاګه نه کړل.
د هند او پاکستان له لوبې یوه ورځ وړاندې کوهلي د تمرین په میدان کې له پاکستاني لوبغاړو سره یو ځای لیدل شوي. خپرې شوې ویډیوګانې کوهلي ښيي چې د پاکستان تیز توپ اچوونکي حارث رؤف ته غېږ ورکوي.
پاکستان د اسیا جام کې د نیپال څخه د خپلې لومړنۍ لوبې له ګټلو وروسته د هند سره د سیالۍ دپاره لوبډله اعلان کړې ده.
د هند سره د لوبې دپاره د پاکستان لوبډله: بابر اعظم (کپتان)، شاداب خان، محمد رضوان، فخر زمان، امام الحق، سلمان علي اغا، افتخار احمد، محمد نواز، حارث رؤف، نسیم شاه، شاهین شاه افریدي.
فورم \ دبحث خونه