د لاس رسي وړ اتصالات

وسله والو په کندهار ښار کې یو افغان پیلوټ وژلی


عکس (ارشیف) کندهار ښار

چارواکي وايي، په کندهار ښار کې نن چهارشنبه غرمه ډسمبر ۳۰ (مرغومې ۱۰) د ولایت مقام سره نژدې​ د وسله والو په يو غلچکي بريد کې يو افغان پيلوټ وژل شوی دی.

په کندهار کې د افغان هوایي ځواک ددغه پیلوټ د وژلو او په افغانستان کې د هدفي وژنو په زیاتوالي سره د افغانستان جمهوري ریاست طالبان ددغه ډول بریدونو مسول ګڼلي دي.

د کندهار يو امنيتي مقام د نوم نه ښودلو په شرط امریکا غږ ته وویل چې د کندهار د دوهمې هوايي لوا نظامي پیلوټ مسعود احمد په پېښه کې وژل شوی دی.

سرچينې زياته کړه چي نوموړی د ولايت مقام په يو کيلو ميتري کې د فابرکې د سرای سره د تګ پرمهال د وسله والو غلچکيو بریدګرو تر برید لاندې راغلی دی.

د کندهار د پوليسو وياند څارمن جمال بارکزي امریکا غږ ته وویل چې په پېښه کې د ملي اردو یو منصبدار وژل شوی، خو د هغه بشپړه هویت یې څرګند نکړ.

نوموړي زیاته کړه: "د ښار ۱۴ حوزې اړوند سیمه کې د قول اردو یو منصبدار د وسله والو په تروریستي برید کې وژل شوی د هویت په اړه یې به یې وروسته معلومات خپاره شي."

د افغانستان جمهوري ریاست ددغو ترورونو پړه پر طالبانو اچوي او وایي چې دغه کار د دولت او خلکو ترمنځ د واټن د ایجادولو په مقصد کوي.

د افغانستان د جمهوري ریاست ویاند صدیق صدیقي په خپل ټویټر پاڼه لیکلي: "په څو تیرو اونیو کې کابل د تروریستي بریدونو شاهد و چې د طالبانو د جنګي کړنلارې؛ برید او انکار، په توګه پرمخ بیول کیږي. ددغو بریدونو هدف د ویرې، ناهیلۍ او د خلکو او د افغانستان د اسلامي جمهوري دولت ترمنځ د فاصلې د ایجادول دي."

مسعود احمد پيلوټ د کندهار اوسيدونکی و او د ځوانو نظامي پيلوټانو له ډلې څخه بلل کيده.

هغه په چک جمهوريت او متحده عربي اماراتو کې د پیلوټۍ زده کړې کړې وې.

تر اوسه چا د دې بريد مسئوليت په غاړه ندی اخيستی.

  • 16x9 Image

    عزیزالله پوپل

    عزیزالله پوپل په جنوبي ولایتونو کې د امریکا غږ اشنا راډیو د پښتو خبریال دی. له امریکا غږ سره د کار له مخه یې په سیمه کې له ملي راډیو او ټلویزیون، روز خبري اژانس، هیواد ټلویزیون او افغان ازاد راډیو سره د خبریال په حیث کار کړی، او د کندهار په پوهنتون کې یې د ادبیاتو زده کړې ترسره کړې دي

XS
SM
MD
LG