د پاکستان ګلګت سیمه کې د یوې پوځي هلیکوپتر د لوېدلو پېښه کې دوه پیلوټان او دوه پاکستاني عسکر مړه شوي دي.
د پاکستان د پوځ «ISPR» مطبوعاتي څانګې د اعلامیې له مخې دا هلیکوپتر د تخنیکي ستونزو له امله نن یکشنبه ډسمبر۲۷ (مرغومې۷) د ګلګت په بالیستان سیمه کې لوېدلې ده.
د پوځ په اعلامیه کې راغلي چې هلیکوپټر په سیمه کې د پاکستان د یوه وژل شوي عسکر د را انتقالولو لپاره تللې وه چې سقوط یې کړی دی.
د پاکستان د پوځ مطبوعاتي ادارې د معلوماتو په اساس په دغه پېښه کې هلیکوپټر هم له منځه تللې ده.
د پاکستان ګلګت بالیستان یوه ستراتیژیکه مهمه غرنۍ سیمه ده چې د چین، افغانستان او د هند تر کنترول لاندې کشمیر سره سرحد لري.
دا په دې وروستیو کې د پاکستان د پوځ څلورمه څرخي الوتکه ده چې لوییږي.
