د لاس رسي وړ اتصالات

افغانستان ته د پاکستاني څارویو په انتقال بندیز 


بله میاشت لوی اختر دی چې مسلمانان په کې څاروي قرباني کوي

په خیبر پښتونخوا کې د پېښور عالي محکمې امر کړی چې د اختر لپاره د قرباني کېدونکو څارویو انتقال دې افغانستان ته بند شي.

محکمې ویلي دي چې که د قربانۍ څاروي افغانستان ته صادریږي، نو پېښور کې به ځايي خلک د قربانۍ ‌د څارویو له کموالي سره مخامخ کیږي.

د پېښور د عالي محکمې مشر قاضي قیصر رشید ویلي‌ دي‌ چې په لوی اختر کې د څارویو د کموالي د مخنیوي لپاره دې افغانستان ته دڅارویو د قاچاق او انتقال مخه ونیول شي.

د امریکا غږ ډیوه څانګه وايي‌ چې تېره میاشت د پېښور عالي محکمې افغانستان ته د زراعتي‌ چرګانو په صادراتو هم بندیز لګولی و.

دا اقدام له هغه وروسته شوی و چې په پېښور کې د چرګانو قیمت لوړ شوی و.

محکمې لارښوونه کړې ده چې اړوندوې ادارې دې د جون په ۲۹نېټه د محکمې د پرېکړې د عملي کېدو لپاره د خپلو اقداماتو راپور وړاندې کړي.

لوی اختر د جولاۍ په میاشت کې دی.

لا معلومه نه ده چې له پاکستان څخه او په خاص ډول له خیبرپښتونخوا څخه څومره څاروي او چرګان افغانستان ته انتقالیږي.

XS
SM
MD
LG