نن دویمه ورځ ده چې په پاکستان کې د شعیه ګانو پر ضد مظاهرې کیږي. مظاهرې د کراچۍ په ښار کې شوي او د سنیانو د سخت دریځو ډلو تر څنګ پکې زرګونو کسانو برخه اخیستې وه.
مظاهره چیانو په پاکستان کې د سني ډلو بیرغونه رپول او د خپلې ډلې د قوت شعارونه یې ورکول.
دا مظاهرې په پاکستان کې د عاشورا د ورځې د لمانځلو نه وروسته شوي. د سني ډلو مشرانو او پلویانو د شعیه فرقې په مشرانو تور لګولی چې د عاشورا په مراسمو کې یې د اسلامي تاریخي شخصیتونو په هکله د سپکاوي ډکې ویناوې کړیدي.
تر اوسه نده معلومه چې د شعیه ګانو مشرانو او پیروانو د عاشورا په مراسمو کې څه ویلي.
یو امنیتي چارواکي د اې ایف پي خبري اژانس ته ویلي چې په مظاهرو کې شاخوا ۳۰ زرو کسانو برخه اخیستې وه خو په مظاهرو کې د تشدد کومه پیښه نده شوې.
دا مظاهرې د جماعت اهل سنت او سخت دریځې ډلې تحریک لبیک پاکستان تنظیم کړې وې.
دغو ډلو پخوا په پاکستان کې دیني مقدساتو ته د سپکاوي پر ضد د تشدد نه ډکې مظاهرې کړیدي.
